Laçi nuk njeh blofe, përmbys Bylisin që në pjesën e parë
Shënojnë Shtubina, Toro e Gjoni,“peshkohet” Tirana
Laçi përmbys Bylisin. Kurbinasve u kanë mjaftuar 44 minuta lojë për të thyer rezultatin në favor dhe kaluar në çerekfinalet e Kupës së Shqipërisë. Edhe pse në “Adush Muça” ndeshja u mbyll në shifrat 2-0 për ballshoitët, dje bardhezinjtë kanë realizuar aq gola sa u duheshin. Shtubina me penallti dhe rrjetat e Toros e Gjonit u kanë mjaftuar të besuarve të Besnik Prengës për të likuiduar kundërshtarin dhe kualifikuar. Dhe tashmë përballë do të kenë Tiranë, një ekip që duhet thënë, ia kanë marrë dorën në vitet e fundit jo vetëm në kampionat, por edhe në Kupë.
NDESHJA – Loja nis e fortë dhe me sulme nga të dyja ekipet. Të parët që mundohen të organizohen janë miqtë, të cilët mundohen të rrezikojnë me Dosen, Jaupajn dhe debutuesin Guindo (i ardhur pak ditë më parë nga Skënderbeu). Dyluftime të ashpra nuk mungojnë, aq sa në të 9-ën akordohet edhe një penallti. Një ndërhyrje në zonë e Doksanit dhe gjyqtari Kridens Meta tregon pikën e bardhë. Ka protesta nga ballshiotët, por vendimi është i padiskutueshëm. Është Shtubina që gjuan dhe nuk fal, duke zhbllokuar shifrat në 10. Bylisi nuk dorëzohet dhe kërkon që të shënojë të paktën një gol, por duket se futbolli i bukur nuk i mjafton. Sakaq, Laçi tregohet cinik dhe ato raste që krijon di që t’i shfrytëzojë. Një goditje në fundore,gjen Toron e pambuluar në siç duhet nga lojtarët e Bylisit, kiliani ka mundësi të stopojë dhe gjuajë, duke shënon golin e dytë. Loja bëhet e ashpër, ndërsa gjyqtari shpesh kontestohet nga lojtarët miq. Ka edhe ndërhyrje brutale nga lojtarët e Laçit, por Meta nuk i “sheh”. Laçi përfiton ndoshta edhe nga trysnia psikologjike e miqve dhe gjen golin e tretë. Ishte e 44-ta kur një top i krosuar nga Shtubina gjen Gjonin, i cili me kokë nuk mund të gabonte. Shokohen ballshiotët, që futen në dhomat e zhveshjes në disavantazhin e 3 golave. Veljko Dovedan nuk pajtohet me rezultatin dhe kërkon të paktën një gol. Freskon sulmin, ndaj largon Muratajn dhe në vend të tij futet Lamçja. Kontestimet ndaj arbitrave nuk kanë të ndalur, pasi edhe lojë efektive pati pak prej faulleve të akorduara. Ballshiotët tentojnë dy herë me kundërsulme, por nuk e gjejnë rrugën e rrjetës. Në fund ka festë te Laçi dhe dëshpërim te mallakastriotët, të cilët tashmë duhet që të mendojnë vetëm për Superioren.