Zë në "tryezën e madhe", ja çfarë përfiton Shqipëria
Zgjedhja e Armand Dukës në Komitetin Ekzekutiv të UEFA-s, që në krye të herës duhet thënë se është një arritje personale e tij. Mirëpo, edhe në fjalën e thënë nga vetë ai, institucioni që drejton dhe futbolli shqiptar në tërësi pritet të ketë përfitime nga rezultati i arritur në Kongresin e 43-të të UEFA-s, që i zhvilloi punimet në Romë.
PËRFITIMET
Çdo katapultim në organizmat drejtues, sigurisht që pasohet me përfitime. Qofshin këto në aspektin personal të karrierës së individit apo edhe të futbollit që organizon institucioni, të cilin ai drejton si president. Së pari, nga zgjedhja e Dukës në KE, Shqipëria do të përfitojë një lobing më të mirë referuar investimeve të rëndësishme që shpërndahen në federata, në mënyrë periodike nga vetë UEFA. Së dyti, do të ishin "xhaketat e zeza", të cilët do të përfitonin mbështetje më të fortë dhe nuk do të anashkalohen në testime apo konkurrime, në rast se do të arrijnë të jenë të barabartë me kolegët e tyre nga vende të ndryshme. Një zë në Komitetin Ekzekutiv, sigurisht që do garantonte për vetë arbitrat në çdo hap gjatë karrierës së tyre. Së treti, kërkesa e Shqipërisë për të organizuar një aktivitet të lartë të futbollit europian, finale të Kompeticioneve U-21 apo edhe ajo e Superkupës së Europës për klube mund të merren më shumë seriozisht në qeverinë europiane të futbollit. Këto dhe të tjera do jenë përfitime direkte apo indirekte të futbollit shqiptar, që tashmë ka zë mes federatave më të fuqishme në UEFA.
ANËTARËT DHE ZËVENDËSPRESIDENTI
Çdo anëtar i Komitetit Ekzekutiv, me përjashtim të presidentit dhe anëtarëve të gjinisë femërore, ka një rol aktiv (për shembull president, zëvendëspresident, sekretar i përgjithshëm ose administrator i deleguar) në federatën respektive. Komiteti Ekzekutiv zgjedh një zëvendëspresident të parë, katër zëvendëspresidentë të tjerë nga propozimet e presidentit të UEFA-s. Presidenti mund t'i japë funksione specifike cilitdo prej zëvendëspresidentëve.
PUSHTETI
Komiteti Ekzekutiv mund të adoptojë rregulla dhe vendime mbi të gjitha çështjet që nuk kanë të bëjnë në juridiksionin legal ose statutor të Kongresit të UEFA-s ose të një organi tjetër. KE administron UEFA-n, me përjashtim të rasteve kur të tilla aktivitete janë deleguar ose disa detyra menaxhimi i janë deleguar nga statutet e UEFA-s presidentit të UEFA-s ose administratës UEFA.
DETYRAT Komiteti Ekzekutiv
*Kontrolli i përgjithshëm i UEFA-s dhe komunikimi i udhëzimeve.
*Përcaktimin e strukturës organizative. *Monitorim dhe supervizim.
*Supervizim total të administrimit të UEFA-s, përfshirë sekretarin e përgjithshëm dhe zëvendëssekretarin e përgjithshëm, lidhur me respektimin e ligjit, të statuteve, të rregulloreve dhe të urdhëresave; aprovimin e biznes planit vjetor për administrimin e UEFA-s.
Mbledhjet
Si rregull i përgjithshëm, Komiteti Ekzekutiv mblidhet çdo dy muaj dhe thërritet nga presidenti. Presidenti mund të ftojë palë të treta në mbledhjet e Komitetit Ekzekutiv në cilësinë e konsulentëve. Komiteti ka një kuorum të barabartë me gjysmën e anëtarëve votues, përfshirë presidentin e UEFA-s ose, në mungesë të tij, një zëvendëspresident.