Piontek “qëllon” dy herë Berishën, Milani blindon vendin e katërt
“Më markoi shumë ashpër, por unë e dija që do të mbërrija te të dy topat”
Kristof Piontek e tha qartë edhe në ndeshjen e kaluar, se nuk ka ndërmend që ta ndërrojë pseudonimin e tij “Pistolero”, ndonëse media italiane është shfrenuar me fantazinë e saj, duke nisur nga “Robocopi” e deri tek “alieni” dhe realisht që, duke parë shifrat e jashtëzakonshme të polakut, ai i meriton të gjitha këto. Por nëse golat sezonalë kanë shkuar 25 në 26 ndeshje, akoma më e frikshme është mesatarja me të cilën ai ka shënuar me fanellën e Milanit. Në pesë ndeshje të luajtura, gjatë të cilave ka grumbulluar 317 minuta lojë, ai ka shënuar gjashtë gola, ose e përkthyer ndryshe, do të thotë një gol çdo 53 minuta lojë, duke djegur edhe kryegolashënuesin Kristiano Ronaldo, i cili shënon një gol çdo 120 minuta lojë. Gjithsesi, për Pio- ntekun nuk ka nevojë për krahasime, as për komplimente, sepse ai konfirmon se do punojë që të shënojë në çdo ndeshje deri në fund të kampionatit: “Besoj shumë te vetja, gjithmonë, dhe e ndiej se mund të shënoj gjithmonë. Gjithsesi, më duhet të pranoj se gjashtë gola në pesë ndeshje të luajtura me Milanin është një numër që nuk e kisha menduar. Është më shumë sesa kisha imagjinuar, por kjo tregon se kam bërë një punë të mirë dhe skuadra më shërben siç duhet. Këtu te Milani jam ndjerë pjesë e rëndësishme që në momentin e parë që zbarkova, pasi më bënë të ndihem menjëherë në familje”. Për sa u përket të dy golave, që të dy ishin fantastikë, pasi në ta ranë në sy cilësitë e tij prej bomberi të frikshëm. 23-vjeçari konfirmon se markimi ndaj tij ishte shumë i ashpër, sidomos beteja me shqiptarin Berat Gjimshiti: “Beteja me Gjimshitin? Ishte shumë e ashpër, pasi më markonte në mënyrë asfiksuese, duke nisur që nga rasti i golit të parë. Por unë e ndjeva se ai top do të vinte tek unë dhe bëra një lëvizje për ta paraprirë rivalin tim. Ia dola me sukses dhe ishte një gol shumë i bukur. Goli i dytë me potencë? E thashë, e ndiej kur topi vjen drejt meje dhe unë thjesht duhet të bëj lëvizjen e duhur. Edhe në atë goditje këndi e dija se mund ta arrija, pasi kisha hapësirë përpara meje për të bërë kërcimin e duhur, në kohën e duhur. Ishte një fitore me shumë peshë, në një fushë shumë të rëndësishme, por ne nuk kemi kohë për të festuar sepse kemi një zonë Champions për të blinduar, prandaj, tani bëjmë mirë që të nisim të mendojmë për ndeshjen e radhës”, përfundoi ylli i ri i Milanit.