Penalltia e Skukës nderon Korabin, thyhet Dinamo
Valle dhe parà, festë te dibranët
Korabi nuk di të ndalet në shtëpi, thyen minimalisht Dinamon. E katërta ndeshje radhazi që dibranët marrin maksimumin e pikëve në fushën e tyre, çka i ndihmon që të konsolidojnë pozitat në pesëshen e parë të Grupit A. Tashmë kanë 27 pikë, po aq sa vetë kryeqytetasit dhe Besëlidhja. Ndeshja ka pasur volum loje për vendësit, të cilët me anë të Skukës dhe Likës vunë disa herë në provë portierin Laço. Sinjali i parë kërcënues vjen në të 5tën minutë, por gjuajtja e “bomberit” Skuka kalon vetëm ngjitur me shtyllën e dytë. Më pas provon Lika, por nuk ia del të finalizojë. Dinamovitët janë parë gjithë kohës në mbrojtje, duke shpresuar të dilnin në kundërsulm nga ndonjë gabim i vendësve. Në minutën e 33-të, Karaj shfaqet rrezikshëm nga një goditje dënimi jashtë zone, por mbrojtja largon gjithçka. Skuka me vështirësi ndjek aksionin dhe gjuan, por portieri i bluve pret gjithçka. Këtu mbyllet dhe pjesa e parë. E dyta nis me dy zëvendësime për vendësit. Në të 47-ën, pas një topi të servirur nga Lika për Kallucin, ky i fundit pengohet në zonë dhe gjyqtari nuk heziton dhe tregon pikën e bardhë. Skuka gjuan penalltinë dhe nuk fal, 1-0 për Korabin. Ky gol rrit shpresat e dibranëve për të gjetur edhe të dytin. Loja ka qenë mjaft e mirë nga të dyja krahët për vendësit. Kalluci dhe Osmani servirën shpesh topa për Likën dhe Skukën, por edhe qendra e mbrojtjes me E. Hoxhën dhe Doçin nuk i kanë lejuar sulmuesit blu t’i afroheshin portës së Birjes. Në të 68-ën, Lika gjuan me kokë brenda zonës, por pret Laço që është i pakalueshëm. Në të 80ën, sërish Skuka provon nga distanca, por topi përplaset në tra. Vërshëllima e gjyqtarit, që sinjalizoi përfundimin e takimit, e gjen rezultatin e pandryshuar. Dibranët matematikisht janë pozicionuar në vendin e pestë dhe festa është legjitime. Lojtarët ndërsa dilnin nga autobusi janë pritur me “Vallen e rrugës” dhe me 20 mijë lekëshe prej trajnerit Bubeqi.