Flamurtari sfidon Skënderbeun, Orges Shehi: Është si derbi
Franc Veliu: Ia dalim me tifozët vlonjatë, do jetë spektakël
Flamurtari do të kërkojë të thyejë sot tersin me Skënderbeun. Vlonjatët, të cilët nuk fitojnë me korçarët në kampionat për më shumë se dy vite, do të tentojnë sot fitoren. Në konferencën e djeshme për shtyp, zëvendëstrajneri Ergi Lubani, duke u ndalur tek e shkuara tha se Flamurtari dhe Skënderbeu kanë qenë të barabartë, pavarësisht se fati i ka buzëqeshur korçarëve. Sipas tij, me fitoren e sotme, Flamurtari është në lojë për Kupat e Europës. "Është një ndeshje, e cila është vlerësuar maksimalisht, jo vetëm se Skënderbeu është kampion në fuqi, por edhe për vetë mënyrën e kampionatit, për barazinë që kanë ekipet. Nga ana jonë do të ketë vlerësim maksimal. Në këtë pikë të sezonit që jemi e vlerësojmë maksimalisht këtë ndeshje. Ne jemi një fitore larg objektivit që i kemi vënë vetes me drejtuesit për një vend në Kupat e Europës. Me një fitore nesër (sot), ne do të jemi në vendin e katërt, pavarësisht se gara është e hapur. Është pak a shumë një përballje direktE për një nga vendet e fundit të pjesëmarrjes në Kupat e Europës, por përballen edhe dy qytetet me traditë në futbollin shqiptar. Edhe sikur t'i kishim fituar tri ndeshjet e këtij viti, prapë do të luanim për fitore, pasi çdo ndeshje ka historinë e saj dhe nuk i referohemi të kaluarës. Në dy takimet e fundit me Skënderbeun, ne kemi luajtur si të barabartë, por fitoret i kanë shkuar korçarëve. Do të preferonim edhe kësaj here që lojën më të mirë ta bënte Flamurtari dhe ne të marrim pikët. Mungon Alla, i cii nuk është stërvitur gjatë gjithë javës. Pjesa tjetër e lojtarëve është e gatshme. Djemtë janë stërvitur për të bërë maksimumin. Kemi 11 lojtarë dhe stolin që mund të bëjnë ndeshje dinjitoze dhe të kërkojnë fitoren dhe të zbatojmë detyrat që kemi dhënë", tha Lubani.
VELIU - Mbrojtësi vlonjat Franc Veliu, tha se ndeshja e sotme është një vitrinë e kampionatit shqiptar. Veliu tha se me mbështetjen e tifozëve sot ia dalin. "Realisht është një ndeshje vitrinë për kampionatin shqiptar. Si objektiv kemi që të shkojmë në vendet e para të renditjes. Jemi në një moment që na duhen pikët, por edhe një lojë dinjitoze, pasi tifozët vlonjatë e duan këtë gjë. Unë shpresoj që tifozët të jenë sa më të shumtë në numër në këtë ndeshje, si gjithmonë. Ata janë lojtari i 12-të për ne. Shpresoj dhe mendoj se vlonjatët me një ndeshje të tillë, aq më tepër me Skënderbeun do të jenë më të shumtë në numër", u shpreh mbrojtësi.