Tirana, Mema: Tifozët s'na durojnë duke u përpëlitur
Sulmuesi kenian u ka shënuar bardhebluve
Shtyrja e takimit Tirana-Luftëtari, e programuar ditën e djeshme në orën 17:00, i ka dhënë një dorë më shumë stafit bluzi për të përgatitur sa më mirë përballjen me 24 herë kampionët e Shqipërisë. Me seancën e paradites së djeshme, të zhvilluar në orën 11:00 në fushën e stadiumit “Gjirokastra”, që thjesht mbarti brenda saj seancën me karakter argëtues, Luftëtari i Julian Ahmatajt u nis pasditen e djeshme në orën 16:00 drejt Durrësit, ku dhe u akomoduan në një prej resorteve të qytetit bregdetar. Përpos shtyrjes së takimit me Tiranën, dyshja Ahamataj-Novi, edhe dje më së shumti u ndal në ideimin e formacionit anti-Tirana. Luftëtari, sot përballë bardhebluve të Tiranës në fushën e blertë të stadiumit “Selman Stërmasi”, pritet të përfaqësohet me më të mirët. DUNGA - Nga Tirana te Tirana. Ky do të ishte slogani më i mirë për një lojtar si Dunga, të cilit sot do t’i duhet të marrë mbi supe misionin e shënimit, qoftë dhe të një goli të vetëm. Ishte pikërisht afrikani nga Kenia që në minutën e 88-të, pas gjuajtjes fluturimthi në zemër të mbrojtjes bardheblu, “arkivoi” fitoren 2-1 të Luftëtarit në sfidën e javës së 13-të, të zhvilluar në Gjirokastër. I vetmi gol që afrikani ka shënuar për ngjyrat e Luftëtarit në 22 javët e deritanishme. Sot, sytë e të gjithëve janë përqendruar te keniani Dunga. Trajneri Ahmataj, aktualisht ka alternativë të mundshme të riun Oshafi dhe ganezin Uarden. I riu beratas, Aldrit Oshaf , duket ende i brishtë për të qenë lideri në majë të sulmit bluzi, ndërkohë që ganezi Uarden nuk posedon kondicionin e mjaftueshëm fizik për të nisur sfidën e sotme si titullar. Nisur nga premisat e mësipërme, Dunga shihet sot si i duhuri për të rigjetur rrjetën e dytë me fanellën e Luftëtarit. FORMACIONI – Porta, si zakonisht mes shtyllave të katërkëndorit bluzi, roje të siguruar do të ketë “gardianin” elbasanas, Shkëlzen Ruçin. Mbrojtja, reparti më i konsoliduar i bluzinjve me afrimin e grekut Dimitris Koconis, meriton të etiketohet si pika më e fortë e bluzinjve. Rapa, Hoxha, Koconis, Xhekson, sot ndaj Tiranës kanë për mision, së bashku me Ruçin, moslejimin e tundjes së rrjetës bluzi. Me dyshen tashmë të fiksuar, Ramadani-Aleksi, ky fundit më i avancuar në mesfushë do të luajë Ahmataj. Në krahët e mesfushës do të operojnë Demo, Rrapo, me Filin në qendër në mbështetje të kenianit Dunga. “E rëndësishme është të shënojmë gol, mjafton mos të pësojmë”. Kështu është shprehur trajneri Ahmataj një ditë para ndeshjes me Flamurtarin, në barazimin 0-0 mes bluzinjve dhe kuqezinjve vlonjatë. Thënies së lartpërmendur, mësohet se trajneri Ahmataj i ka kushtuar jo pak kohë përgatitjes.