Kamza, gati për finalen e mbijetesës
Priten shumë tifozë, klubi kërkon siguri shtesë nga privati dhe policia
Kamzalinjtë në seancën e fundit të zhvilluar në qytetin bregdetar të Durrësit u kanë dhënë fund të gjitha përgatitjeve për përballjen e radhës kundër Kastriotit. Ndeshje kjo, që do të zhvillohet në stadiumin e Kamzës në prani të tifozërisë së saj. Gjithsesi, kjo javë për skuadrën ka qenë një përgatitore larg syve të mediave, duke i zhvilluar seancat më shumë me dyer të mbyllura. Edhe ekipi ka qenë memec karshi mediave, në mënyrë që të mos zbulohet diçka nga skemat, taktikat, por edhe të mos impresionohen lojtarët para sfidës, duke zgjedhur rrugën e heshtjes për shtyp dhe qetësinë buzë Adriatikut. Tashmë çdo gjë është gati. Skuadra e ka kaluar edhe natën e djeshme e grumbulluar. Pritet që në fushë trajneri Ernest Gjoka të hedhë formacionin e tij më të mirë, jo vetëm nga pikëpamja e titullarëve, por edhe të performancës aktuale të çdo lojtari. Tifozëria - Pritet që kjo ndeshje të ndiqet nga një numër i madh tifozësh, nga të dyja ekipet, pasi e kanë mjaft të domosdoshme edhe mbështetjen e tyre për këtë finale të mbijetesës, si nga qyteti i Kamzës, por edhe nga qyteti i Krujës, duke qenë shumë pranë Kamzës do të bëjë të mundur mbushjen e shkallëve të stadiumit. Masat - Drejtuesit e klubit të Kamzës kanë marrë të gjitha masat paraprake, si riparimin e fushës që pas ndeshjes Kukësi - Tirana, korrjen e barit, pastrimin e ambienteve të brendshme, dushet e dhomat e zhveshjes. Janë marrë edhe masat e sigurisë, duke bërë njoftimet e nevojshme pranë firmës private të sigurisë, duke kërkuar më shumë forca po ashtu edhe njoftimin e policisë së shtetit.