Sulmuesit, ja plani i Interit për të zëvendësuar Ikardin
Pëlqehen Xheko, Zapata e Lukaku, romanisti i përzgjedhuri i... Spaletit
Çështja "Ikardi" ka futur në një dilemë të madhe drejtuesit e Interit. Vendimi i tyre për t'i hequr shiritin e kapitenit dhe për t'ia dhënë Handanoviçit, nuk u prit mirë nga sulmuesi argjentinas. Tani duhet të kuptohet se çfarë do të ndodhë në të ardhmen e afërt, por edhe në atë të largëtën. Dy ditë më parë pati një takim mes drejtuesve, trajnerit dhe vetë lojtarit, por nuk ishte prezent administratori Marota. Në ditët e ardhshme do të ketë takime për të kuptuar nëse bomberi zikaltër do të pranojë vendimin dhe do të rikthehet në shërbim të skuadrës apo ka ndodhur përfundimisht një krisje e madhe dhe ai do të kërkojë largimin në fund të sezonit. Kjo e dyta ka më shumë mundësi që të ndodhë dhe të gjendur në këtë situatë, drejtuesit po mendojnë edhe për zëvendësuesin e tij në merkaton e verës. Sipas "Corriere Dello Sport", janë duke u vëzhguar 4 alternativa dhe profile që i pëlqejnë Spaletit (i cili nuk dihet nëse do të jetë trajner në sezonin e ardhshëm). Emrat në listë janë të shumtë, por 4 prej tyre duken më interesantë. Bëhet fjalë për Lukakun e Junajtid, Xhekon e Romës, Vernerin e Lajpcigut dhe Zapatën e Atalantës. Për këtë të fundit është raportuar se ka një akord me zikaltrit për t'u transferuar në verë, por ende nuk dihet. Është një nga lojtarët më të mirë të këtij viti në Serinë A dhe shumë skuadra të mëdha janë vënë në ndjekje të tij. Po ashtu, Xheko shihet si një alternativë e vlefshme që pëlqehet shumë nga Spaleti, i cili e ka stërvitur te Roma dhe e konsideron një sulmues që ndihmon skuadrën në lojën me topin. Më pak të mundshëm janë dy lojtarët e tjerë, Lukaku dhe Verner. I pari është një lojtar potent, por ka pikëpyetje mbi vazhdimësinë e tij, ndërsa i dyti do të ishte një bast për zikaltrit. Verner është një lojtar shumë i fortë, por ekzistojnë dyshimet mbi faktin nëse do të përshtatej shpejt në futbollin italian apo jo. Fillimisht duhet të kuptohet e ardhmja e Ikardit, që për momentin duket shumë i vështirë për t'u rikuperuar dhe do të kërkojë që në fund të sezonit të nisë një aventurë të re larg Milanos.