Smajlaj: Ballkaniada, një stërvitje para Europianit
Presidenti i federatës, Gjergj Ruli: Paraqitje e shkëlqyer nga atletët tanë
Izmir Smaljaj u rendit i dyti në garën e kërcimit për së gjati, duke regjistruar një kërcim 7.70 metra në Ballkaniadën e sallave të mbyllura të Turqisë. Ky rezultat i mundësoi medaljen e argjendit atletit shkodran, por Smajlaj thekson se ky event ishte një test për të, pasi stërvitja e fortë që ka kryer pritet që ta sjellë në formën maksimale për në garat e Kampionatit Europian. Sportisti shkodran e komentoi kështu paraqitjen e tij në garën e djeshme: "Prisja diçka më shumë, por kam marrë ngarkesë shumë të madhe në stërvitje dhe sot (dje) nuk isha në maksimumin tim. Stërvitjet i kemi kryer për të qenë në një formë sa më të mirë për Kampionatin Europian dhe nuk i kemi ulur aspak ngarkesat e seancave. Ballkaniada e sallave të mbyllura ishte si një testim për mua. Tashmë synoj që të arrij zonën e medaljeve në Europian, edhe pse është një garë shumë e fortë". Rezultatet e sportistëve shqiptarë i vlerësoi si të shkëlqyera edhe presidenti i Federatës Shqiptare të Atletikës, Gjergj Ruli. Për "Panorama Sport", Ruli u shpreh kështu: "Siç dihet, kërcimi për së gjati është një garë teknike ku diferencën e bëjnë detaje të vogla, megjithatë ishte një paraqitje e shkëlqyer nga Izmiri. Ky është një rezultat stërvitor për ne, sepse kërcimet që ka bërë Smajlaj janë shumë më të larta se kaq. Të mërkurën do të nisemi për në Gllazgou, ku na pret Kampionati Europian dhe prova e sotme (djeshme) ishte si një stërvitje, pasi kemi punuar fort dhe Izmiri ka marrë shumë ngarkesë. Luiza konfirmohet edhe një herë duke fituar medaljen e artë, Franko Burraj theu rekord kombëtar në garën e 400 metrave dhe kjo është një paraqitje e shkëlqyer e Shqipërisë në këtë kompeticion, që tashmë nuk është më ballkanik, por më i gjerë, pasi marrin pjesë 20 shtete e ku së fundmi është pranuar edhe Azerbajxhani. Tani në Europian do mundohemi të bëjmë më të mirën, ndonëse konkurrenca është shumë e lartë, me shtete shumë të zhvilluara, ndërkohë që ne nuk kemi as pistë", tha Ruli, i cili përveç kreut të FSHAsë, është edhe trajneri personal i Izmir Smajlajt.