Lushnja trondit Besën, Tomori braktis garën
Kavajasit pa shkëlqim, pësojnë disfatën e tretë në kampionat
Me nga një gol në secilën pjesë, Lushnja ka mundur me rezultatin 2-0 Besën në stadiumin “Roza Haxhiu”. Skuadra e drejtuar nga Ilir Gjyla ka marrë tri pikë të rëndësishme duke siguruar aritmetikisht pjesëmarrjen në minigrupin kryesor për fazën e tretë të kampionatit. Asgjë për Besën që vuajti pasojat e fitores ...
Me nga një gol në secilën pjesë, Lushnja ka mundur me rezultatin 2-0 Besën në stadiumin "Roza Haxhiu". Skuadra e drejtuar nga Ilir Gjyla ka marrë tri pikë të rëndësishme duke siguruar aritmetikisht pjesëmarrjen në minigrupin kryesor për fazën e tretë të kampionatit. Asgjë për Besën që vuajti pasojat e fitores me Egnatian. Skuadra e Maganit tregoi vështirësi për të bërë ndjekësen e Bylisit. Përballë Lushnjës, verdhezinjve u mungoi shkëlqimi duke shprehur një pafuqi të theksuar në të shumtën e ndeshjes.
GOL DHE DËMTIM Lushnja arrin të vërë përpara Besën që në fillimin e takimit. Skuadra e drejtuar nga Gjyla shkëlqen nga pikëpamja e pasimeve dhe e qarkullimit të topit. Shpërblimi vjen në minutën e 12-të. Pas një krosimi nga e djathta Allkanjari kthen bukur me kokë, por topi përplaset në traun e portës. Nga pas vjen si "vetëtimë" Alushi që topin e rikthyer e godet shpejt dhe fort. Sfera përplaset në pjesën e brendshme të traut dhe përfundon në rrjetë. Një gol spe- ktakolar! Në minutën e 28-të, Alushi shënon përsëri me një goditje brenda zonës, por anësori Zalla anulon golin. Loja e Besës në vend që të ngrihet bëhet më e ashpër me faulle të shumtë. Stafi mjekësor i Lushnjës hyn disa herë në fushë. Por, ai që nuk vazhdon dot më
është Alushi, të cilin Gjyla është i detyruar ta zëvendësojë me Ademin.
I ZAKONSHMI SEFA Pjesa e dytë nis më mirë për Besën që duket më e gjallë. Për pasojë rreziku i parë vjen shpejt, që në minutën e shtatë. Pasi kanë thyer një aksion të lushnjarëve, Çekiçi pason bukur për Ejoh në të djathtë. Sulmuesi i Besës arrin të udhëheqë topin, por përballë Spahos gabon duke e dërguar sferën në rrjetën e jashtme. Lushnja kalon disa minuta të trembura dhe vijon gabimet, por pa pasoja. Skuadra e Gjylës e rimerr veten. Në zhvillimet e një goditjeje këndi nga e djathta, Sefa ngre në këmbë 1000 shikuesit në "Roza Haxhiu". Sulmuesi 34vjeçar kërcen bukur, kthen saktë me kokë në të djathtë të Mirakës dhe topi pushon në rrjetë, 2-0. Pas golit të dytë Besa e ka humbur fare. Në shtesë mund të kishte shënuar Cara. Megjithatë, te Lushnja nuk shkëlqen vetëm Sefa, por edhe 36-vjeçari Spaho. Portieri lushnjar ndal dy herë Carën në minutën e 91-të dhe 93-të. Fitore e pastër e Lushnjës që nis festën.