Kukësi, Gjici lëkundet për Cungun
Humbja e Partizanit zbut presidentin, ka shanse për rikthimin e Armandos
Humbja ndaj Teutës shkaktoi shumë pakënaqësi në radhët e klubit verilindor, derisa ishte presidenti Gjici ai që lajmëroi vartësit e tij për vendimin që kishte marrë për trajnerin Cungu. Në nerva e sipër presidenti lajmëroi se kishte shkarkuar Cungun, e ishin këta të fundit që lajmëruan trajnerin për një takim me presidentin në mëngjesin e ditës së diel. Kjo pasoi më pas edhe me mosdaljen e trajnerit në stërvitje.
TAKIMI
Ashtu siç ishte paralajmëruar në numrin e djeshëm të gazetës, presidenti i Kukësit Safet Gjici ka pasur një takim me trajnerin Armando Cungu në Tiranë. Mësohet se palët kanë diskutuar për situatën në ekip pas 2 humbjeve radhazi dhe natyrisht për një zgjidhje konsensuale të kontratës. Zyrtarisht nga klubi verior nuk ka asnjë konfirmim për shkarkimin e Cungut. Gjici ka treguar edhe në të kaluarën se është i paparashikueshëm në situata të tilla. Natyrisht shanset për të vazhduar shkodrani në pankinë janë të pakta, por nuk përjashtohet mundësia që në orët e ardhshme presidenti të ndryshojë mendim.
BISEDA
Gazeta mëson se trajneri Cungu ka marrë përgjegjësitë dhe nuk e ka aspak problem që palët t’i japin dorën njëritjetrit, por ai nuk i ka lënë pa kujtuar punën që ka bërë me Kukësin. “E mora ekipin kur nuk lidhte dot dy topa, në një gjendje mizerabël. U rrit si skuadër dhe për pak nuk shkuam në turin e katërt. Hilet e tyre për vizat na ndalën. Pa harruar kampionatin që prodhojmë lojë dhe raste. Pse faji im është që sulmuesit dalin nga 5 herë para portës dhe nuk shënojnë?! Gjithsesi, nëse do që unë të qëndroj ose më lë dorë të lirë mos të kem presion, ta bëj punën siç di ose e mbyllim sot këtu. Çfarë pune kam bërë unë pyet çunat ti...”, kjo mësohet të ketë qenë një pjesë e diskutimit të Cungut me presidentin Gjici. Sakaq, mbas më shumë se gjysmë ore takim, presidenti Gjici i ka thënë se do ketë një vendim të dytë për të, e mandej palët janë larguar. Por, trajneri ka vënë në pah sigurinë, cilësinë e tij në punë, por dhe kushtet.
KALENDARI
Me fitoren e Laçit ndaj Partizanit, për Kukësin nuk ka ndryshuar asgjë, e pritet që kreu i klubit të bëjë prapakthehu,
e t’i japë akoma një shans trajnerit. Kukësi vijon të jetë në garën për titull, pasi kalendari e favorizon. Verilindorët presin në shtëpi Kamzën, Luftëtarin e shkon në Korçë, ndërsa Partizani pret Flamurtarin, ka derbin me Tiranën, pastaj ndeshet me Teutën që ka një formë mjaft të mirë. Kalendari i bën mjaft optimistë verilindorët.
STËRVITJA
Ndërkohë stërvitjen e djeshme që nisi në orarin e pazakontë 10:30, Kukësi e ka zhvilluar jo nën drejtimin e trajnerit, por e kryesuar nga zëvendëstrajneri Rrahman Hallaçi. Të pranishëm në stërvitje, në Pezë kanë qenë edhe drejtorët e Kukësit, Ramadan Ndreu dhe Nderim Nexhipi. I pari mësohet se ka thënë para skuadrës “se do të presim vendimin e presidentit për trajnerin, ndërsa përkohësisht vazhdoni stërvitjen me zëvendëstrajnerin Rrahman Hallaçi”. ALTERNATIVË
PËR STOLIN
Paçka se trajneri Cungu nuk është shkarkuar zyrtarisht, zërat nga burimet flisnin se alternativë për stolin është dhe vetë Ramadan Ndreu, i cili ka trajnuar disa ekipe në Superiore e ka një përvojë të gjatë trajningu. Ditët e fundit kanë qarkulluar zërat për ish-trajnerin e Partizanit, Shpëtim Duro, por palët nuk janë futur në bisedime konkrete. Alternativë ka qenë edhe italiani Andrea Agostineli, i cili në kampionatin shqiptar ka drejtuar Partizanin dhe Skënderbeun.