Telushi kërcënohet pas ndeshjes, plas sherri në fushën e Laçit
Pikante/ Presidentët kureshtarë për penalltinë, Shtubina shpërblehet
-Fundi i ndeshjes ka sjellë një situatë kaotike në fushën e lojës, pasi nuk kanë munguar kërcënimet dhe përplasjet. Pas ndeshjes, Bruno Telushi është kërcënuar me jetë, ku protagonistë kanë qenë pjesëtarë të skuadrës vendëse, por edhe tifozë që kishin arritur të hyjnë në fushë. Në këtë kohë ka reaguar edhe lojtari i të kuqve, por fatmirësisht ndërhyrja ka qenë e shpejtë nga të dyja klubet dhe forca të sigurisë që situata të mos degjeneronte. Madje në sherr është përfshirë edhe trajneri Skënder Gega, i cili i ka mbledhur lojtarët e tij dhe në fund kanë shkuar për të përshëndetur tifozët, si dhe për t’u kërkuar falje për humbjen. -Hera e parë që Laçi si klub organizator, pranon të rrisë përqindjen e lejuar të tifozërise mike në bazë të kapacitetit të stadiumit. Sektori i parashikuar me 120 ndenjëse nuk mjaftoi dje, teksa pjesa tjetër u vendos në tribunën pas porte. Rreth 500 tifozë të Partizanit kanë qenë të pranishëm dje në Laç, ku spikatën edhe me koreografinë e tyre. Mbi 1500 tifozë ishin të pranishëm në stadium. -Astrit Ziu dhe Perlat Musta ishin tifozët specialë të Partizanit, të cilët preferuan të akomodohen në tribunën qendrore duke u “shkrirë” me tifozërinë. -Trajneri Besnik Prenga, ndërsa skuadra po kryente fazën e nxehjes, ka diskutuar për disa minuta me stafin e tij të ngushtë. Në dukje ishin disa vendime të tyre lidhur me alternimet në fushë pas ekspozimit të formacionit kundërshtar. Si një ish-lojtar i Partizanit, Prenga para ndeshjes ka biseduar edhe me trajnerin Gega si shokë të një ekipi.
-Në pushim të takimit, të dy presidentët e klubeve kanë nxituar të shohin në monitor momentin e penalltisë në favor të vendësve. Presidenti Demi e ka lënë stadiumin pa u mbyllur ndeshja. -Një biznesmen laçian, shpesh ka përdorur shpërblimin direkt për autorët e golave bardhezi. E bëri dhe dje, teksa ka “çarë rrethimin”, dhe i ka dhënë Shtubinës një “peshqesh’ simbolik.
-Në fund të pjesës së parë, Xhixha mori një të shtyrë në zonë. Pretendimit të lojtarit për penallti i janë përgjigjur vetë mbështetësit bardhezi, teksa i thanë me humor: “Nuk jepen dy penallti në një ndeshje”.
-Trajneri Gega shpeshherë është ankuar gjatë ndeshjes te gjyqtari i katërt për vonesat e lojës. -Në minutën e 73-të ka një tentativë për përplasje mes dy tifozërive, ku nuk munguan sharjet dhe hedhja e sendeve. Por, me hyrjen në stadium të forcave të policisë, situata normalizohet. -Pas ndeshjes, trajneri Gega, ka hyrë në fushë për t’i thënë diçka trupës gjykuese. Sa duket, tekniku i kuq, ka pasur pretendime për rastin e penalltisë dhe për vonesat e lojës.