“Diplomati” Vrapi: Ja pse Teuta është e pathyeshme
Zv.trajneri i durrsakëve: Fitore e madhe me Kukësin
Duhej të vinte një përmbysje përballë Kukësit për të rikthyer Teutën te fitorja pas katër javësh. Shumë emocione që nuk i përjetuan vetëm lojtarët në fushën e lojës, por edhe stafi teknik. Njëri prej tyre ishte dhe zv.trajneri i durrsakëve, Endri Vrapi, i cili në një prononcim për “Panorama Sport” thekson se fitorja përballë verilindorëve ishte fitore karakteri dhe se kishin besim te Hidi që do ndalte Uillian.
Më në fund Teuta arrin të fitojë dhe për më tepër ndaj një kundërshtari direkt si Kukësi. Çfarë ndryshoi në këtë takim?
Natyrisht një fitore e rëndësishme që erdhi në një moment të duhur. Hymë me besimin dhe dëshirën e duhur për të fituar dhe në fund ia dolëm.
të përmbysur në pjesën e dytë. Çfarë ndodhi në dhomat e zhveshjes, cili ishte motivimi kryesor dhe a e prisnit përmbysjen?
Të themi të drejtën gjithmonë ne si staf kishim besim që nuk do e humbnim dhe pse ishim në disavantazh minimal. Në pushim, në dhomat e zhveshjes normalisht trajneri foli me lojtarët dhe të gjithë besuam sërish. Djemtë treguan forcë karakteri dhe arritëm të përmbysnim rezultatin dhe jo vetëm, por edhe lojën duke dominuar kundërshtarin.
Si e përjetoi stafi teknik momentin delikat në fund, penalltinë?
Në atë moment, duke parë dhe minutën e 94-t që ishte takimi, na u duk disi e çuditshme penalltia. Natyrisht që nuk ishte aspak një moment i mirë, apo i qetë, por të gjithë e kishim një shpresë duke ditur se në portë kemi një ekspert si Isli Hidi. Ndoshta dhe Zoti ishte me ne për ta mbajtur fitoren dhe tri pikët në Durrës.
Sa i rëndësishëm ishte ky trepikësh?
Çdo trepikësh ka rëndësinë e tij dhe çdo ekip vlerësohet njësoj. Ky trepikësh, kjo fitore, mënyra se si erdhi është një shtysë për realizimin e objektivave, pjesëmarrjen në Europë.
15 ndeshje pa humbje dhe vendi i dytë në tabelë...
Ndihemi mirë të gjithë. Kemi krijuar një harmoni brenda grupit dhe trinomi “lojtar-stafpresidencë” ka funksionuar nga dita e parë dhe po funksionon në mënyrë perfekte.
Tani luhet përballë Luftëtarit në Gjirokastër. Një transfertë disi e hidhur, e cila luhet dhe pa Osmanin...
Mendoj dhe shpresoj se do kemi forcën e duhur për ta kaluar me sukses dhe ndeshjen e radhës.
Çfarë synon ekipi në këtë edicion ? Do ishte arritje vendi i dytë ?
Siç kemi folur gjithnjë skuadra ka objektiv Europën. Këtë gjë duam ta sigurojmë sa më parë. Kjo është më e rëndësishmja për ne dhe qëllimi ynë, më pas dhe vendi dytë është i merituar.