Apolonia korri atë që mbolli, i jep lamtumirën Superiores

Fierakët përfundimisht në grupin e mbijetesës

Nuk ka surpriza dhe gjithçka është vendosur edhe për Grupin B të Kategorisë së Parë, një javë përpara përfundimit të fazës së dytë. Verdiktet janë të pamëshirshme dhe të merituara për atë që kanë dhënë ekipet gjatë këtij sezoni. Flasim për Apoloninë, që është në vendin e duhur me atë që ka bërë gjatë këtij kampionati. Bëri bujë me përforcime serioze dhe e nisi fazën përgatitore në verë më herët se kushdo tjetër, më pas largoi në dimër thuajse të gjithë ata që erdhën në verë, pasi u dorëhoq trajneri Miho, që erdhi me premtime serioze. Apolonia nuk meritonte më shumë se kaq, pasi nuk i falet një skuadre që synon Superligën të humbasë në fushën e vet 3 ndeshje: me Egnatian në minutën e fundit shtesë me autogol, me Elbasanin që tri fitore ka në total gjithë kampionatin dhe me Orikumin, skuadrën 6-vjeçare dhe debutuese në këtë kompeticion. Nuk diskutohet që fierakët e meritonin fitoren në Berat, sepse janë pamjet filmike që flasin qartë, paçka pretendimeve të beratasve, por nuk meritonte kjo Apoloni që vetëm dy javët e fundit të kërkonte grupin e elitës, kur nuk mbahet mend qysh kur kjo skuadër ka qenë në 5 vendet e para të renditjes gjatë këtij kampionati, sa edhe vetë skuadra e ka harruar. E meritonin fierakët për atë që dhanë në këtë garë dhe mbase u bëhet mësim për të projektuar siç duhet sezonin e ardhshëm, qoftë dhe duke marrë shembull nga "lektori" i fundit, Orikumi.

- Pas fitores së djeshme të Lushnjës ndaj Besës, fierakët mbeten përfundimisht në 5-shen e dytë të kampionatit dhe do u duhet të luftojnë për t'i shpëtuar rënies nga kategoria. Edhe pse e nisën kampionatin me synimin e madh për të qenë pretendentë për ngjitjen në Superiore, skuadra nuk arriti që të rivalizonte siç duhet duke kaluar krizë në shumë javë.