Marota "Mauro s'është përjashtuar nga skuadra"
Pas heqjes së shiritit të Mauro Ikardit ka folur për herë të parë administratori Bepe Marota. Ai thotë se u bë diçka e tillë për të mirën e skuadrës, por nuk duhet të konsiderohet si përjashtim. Madje, numri dy i klubit zikaltër thotë se shumë shpejt do të takohen për rinovimin. Si i komentoni reagimet e Vanda Narës në rrjetet sociale? Fakti që shkruan "Forca Inter" është një shenjë pozitive e lidhjes që ka me skuadrën zikaltër. Nuk ka pasur kurrë tension mes palëve, por thjesht një vendim i marrë nga ne. Madje, nuk lidhet as me disiplinën e lojtarit. Por Interi është një familje e madhe dhe kryefamiljarët shpeshherë duhet të marrin vendime të rëndësishme. Është një vendim që mund të forcojë sensin e pjesëmarrjes dhe kulturën e fitoreve në të ardhmen. Keni kontaktuar me Vanda Narën pasi e sulmuan me gurë? Ishte gjëja më minimale që duhet të bëja për t'i shprehur solidaritetin asaj dhe familjes. Shkëmbeva mesazhe me të dhe ishte shumë e edukuar. Ashtu siç konsiderojmë korrekte mënyrën si ajo sillet me ne. Por ka disa principe që duhet të respektohen dhe duhen marrë vendime. Ju prisni një hap nga Ikardi në këto momente? Nuk është çështje hapash. Roli i Spaletit në këtë çështje ka qenë shumë i rëndësishëm. Nuk është thjesht një trajner i madh, por edhe një menaxhues i mirë i dhomës së zhveshjes. E përsëris që nuk e kemi përjashtuar Ikardin nga grupi. Mauro është një lojtar i rëndësishëm për ne dhe do të vazhdojë të jetë. Nga kjo situatë do të rritemi të gjithë. E ardhmja e Ikardit tek Interi mund të jetë e komprometuar? Kam lexuar shumë gjëra. Kontrata e tij dhe rinovimi nuk duhen të diskutohen. Nuk kanë lidhje fare me këtë temë dhe kur ne të bëjmë një propozim për rinovimin do të diskutohet. Lojtari ka edhe 2 vite e gjysmë kontratë. Do të ulemi si me të gjithë lojtarët. Situata e shiritit nuk ka lidhje me rinovimin, por ka të bëjë me menaxhimin e grupit, në takimet me skuadrën, me drejtuesit dhe me tifozët. I kam premtuar Vandës se do të bëjmë një ofertë konkrete dhe kjo do të ndodhë pas disa javësh.