Gjyqtarja Rudina Omari, në gjysmëfinalen e Kupës së CEV-it,
Volej/ Arbitres nga Tirana i besohet supersfida europiane
Gjyqtarja ndërkombëtare e Shqipërisë, Rudina Omari, është caktuar nga CEV (Konfederata Europiane e Volejbollit) të drejtojë si gjyqtare e dytë në ndeshjen gjysmëfinale të Kupës së CEV-it, ndërmjet skuadrave të meshkujve Olimpiakos i Pireut dhe Itas Trentino. Kupa e CEV-it është kupa e dytë për nga rëndësia pas Ligës së Kampioneve dhe caktimi i një arbitri shqiptar në ndeshjen gjysmëfinale është një vlerësim shumë i lartë i CEV për arbitrat tanë në përgjithësi dhe për Rudina Omarin në mënyrë të veçantë. Në një prononcim për gazetën “Panorama Sport”, Rudina Omari u shpreh për këtë vlerësim të madh që i behët nga CEV, duke i besuar një takim të një rëndësie të lartë: “Dëshiroj që të ndaj këtë lajm shumë të mirë me të gjithë miqtë dhe dashamirësit e mi të shumtë në komunitetin e volejbollit shqiptar. Është një vlerësim shumë i lartë që më bëhet mua personalisht, por edhe volejbollit shqiptar. Është rrjedhojë e punës së palodhur për ngritjen profesionale si arbitre ndërkombëtare dhe të gjithë kolegëve të mi arbitra, të vjetër dhe të rinj, shqiptarë dhe të huaj, të cilët më kanë ndihmuar në karrierën time 20vjeçare si arbitre volejbolli në Shqipëri dhe 17-vjeçare si arbitre ndërkombëtare. Ndeshja ku jam caktuar është e një rëndësie të veçantë, jo vetëm për faktin se është ndeshja e parë gjysmëfinale e Kupës së CEV-it, por se për herë të parë një arbitër shqiptar do të drejtojë një ndeshje ku luan skuadra fituese në fuqi e kampionatit botëror për klube. Kujtoj se Itas Trentino fitoi kampionatin botëror të klubeve të zhvilluar para 3 muajsh në Poloni”, deklaroi gjyqtarja e mirënjohur shqiptare. Ndeshja gjysmëfinale ndërmjet Olimpiakosit të Pireut (Greqi) dhe Itas Trentinos (Itali) do të zhvillohet më 26 shkurt 2019, në pallatin e sportit që mban emrin e një personaliteti të kulturës me gjak shqiptar, aktores dhe politikanes së njohur të Greqisë, Melina Mërkuri. Nuk na mbetet tjetër, veç t’i urojmë gjyqtares Rudina Omari një ndeshje sa më të mirë dhe suksese të mëtejshme në karrierën e saj, brenda dhe jashtë Shqipërisë.