Bajernin e mbajti gjallë Martinezi në Liverpul
Niko Kovaç dëgjoi kritikat dhe aktivizoi spanjollin ndaj "reds"
I buzëqeshur dhe me celular në dorë, u largua Havi Martinez nga "Anfield". Telefoni i tij me siguri ka qenë i mbushur me telefonata të humbura dhe mesazhe pa fund urimi. Ai ishte një nga lojtarët më të mirë në ndeshjen e së martës në Liverpul. "Ai bëri një sfidë të madhe", u shpreh Rumenige pas ndeshjes. I të njëjtit mendim ishte edhe presidenti bavarez Uli Hënes i cili bëri komplimente për veteranin e mesfushës. "Havi më pëlqeu shumë, tregoi maturi në një ndeshje të vështirë". Spanjolli zhvilloi takimin e 50-të në Champions.
LOJTARI QË RUAJTI EKUILIBRAT
Ajo që i ra në sy edhe drejtuesve kryesorë të Bajernit, ishte se si Havi solli stabilitet në mesin e fushës. Spanjolli mbylli shumë hapësira, fitoi pothuajse çdo dyluftim si dhe niste vazhdimisht sulme në drejtim të portës së anglezëve. Kjo ndihmoi skuadrën të mbante portën të paprekur për herë të parë që nga starti i fazës së dytë. "Nuk është hera e parë që Havi bën kështu paraqitjesh, në këto ndeshje ai gjithmonë ka treguar se është një lojtar kyç", ishin fjalët e kapitenit Manuel Nojer pas ndeshjes. Ishte Lotar Mateus ai që këshilloi trajnerin Niko Kovaç për të aktivizuar më shumë spanjollin në mesin e fushës. "Eksperienca e tij do të ishte një ndihmesë shumë e madhe për ekipin dhe Kovaç nuk duhet të qëndrojë indiferent", këshilloi ish-kapiteni i Bajernit, Mateus. Vetë lojtari u tregua modest dhe u shpreh për fitoren se ajo kishte ardhur në momentin e duhur. "Të gjithë mendonin se ndeshja do të përfundonte ndryshe. Por ne vërtetuam se nuk trembemi nga askush. Unë më i miri në fushë? Faleminderit, po ne luajmë si skuadër dhe jo si individë. Mundohem të jap gjithmonë maksimumin për ekipin. Kemi shumë takime të vështira përpara dhe duam të shkojmë shumë larg në Champions dhe kampionat", u shpreh spanjolli pas barazimit 0-0 në Angli.
MARTINEZ ËSHTË ATY KUR DUHET
Pse luajti Martinez? Nën drejtimin e Niko Kovaçit, 30-vjeçari nuk ka luajtur si titullar, por gjithsesi ka qenë aty kur trajneri ka kërkuar impenjimin e tij. Por në kampionat ai është shfaqur disi i ngathët dhe shpeshherë është cilësuar nga tifozët si një lojtar që i ka mbaruar koha te Bajerni. Zërat për një largim të tij nga bavarezët ishin shtuar në javët e fundit. Atletiko e Bilbaos kishte bërë një ofertë drejt lojtarit. Bajerni u duk në fillim i lëkundur, por me paraqitjen e fundit në Champions, ai jo vetëm që nuk do të largohet, por do të jetë me siguri në formacionin bazë në pjesën e mbetur të kampionatit. Kovaç me siguri ka nxjerrë një mësim nga takimit me Liverpulin, kampionë si Martinez mund të rilindin papritur.