Një kroat “kërcënon” Tiranën: I pret humbja
Pervan: Pavarësisht mungesave, i bindur që marrim 3 pikë
Skënderbeu nuk ka më kohë për të humbur dhe mbi të gjitha për të lënë pikë rrugës. Skënderbeu, pak e nga pak po largohet edhe nga objektivi për të qëndruar në pjesën e sipërme të renditjes. Humbja në Vlorë riktheu sërish aromën e krizës në familjen bardhekuqe. Krizë, e cila sipas mesfushorit kroat Marko Pervan, duhet të lihet pas sa më shpejt. Madje, që në ndeshjen me Tiranën, ekipi duhet të reagojë për të qenë sërish në rrugën e duhur të objektivave sezonalë. Në prononcimin e dhënë për “Panorama Sport”, Pervan ka bindjen se skuadra do të reagojë në ndeshjen ndaj Tiranës, pasi lojërat që ka zhvilluar Skënderbeu në këto takime të fundit nuk kanë qenë aspak negative. Mungesa e fatit ka bërë që ekipi të mos marrë rezultat. “Të vjen keq kur humbet një sfidë në atë mënyrë, pasi nuk meritonim të mbaronte ashtu ai takim. Kundërshtari nuk bëri asgjë më shumë në këtë takim dhe ishte ndeshja tipike që duhet të përfundonte në barazim. I shkuam afër golit, por për një pasaktësi të sulmuesit nuk arritëm të barazonim. Ishte një përballje ku fati nuk donte të merrnim pikët që na takonin. Nuk besoj se kjo humbje ka rikthyer sërish atë gjendje te Skënderbeu, pasi e shohim që loja po funksionon dhe jemi duke bërë mirë. Nëse i rikthehemi ndeshjes ndaj Flamurtarit nuk ishte një takim që ne e meritonim ta humbnim, pasi loja ishte e barabartë. Plus kësaj, edhe ekipin pas analizës me trajnerin e kam parë të motivuar dhe me dëshirën për të bërë mirë”, theksoi Pervan.
TIRANA - Në anën tjetër mesfushori kroat i Skënderbeut është ndalur edhe te ndeshja e radhës me Tiranën, ku ka vlerësuar kundërshtarin për shkak të lojës që bën dhe rezultateve në rritje që ka marrë në ndeshjet e fundit. Prandaj në të tilla kushte, Pervan paralajmëron Skënderbeun se nuk do të ketë mundësi tjetër veç fitores. “Ndaj Tiranës është sfidë e rëndësishme, pasi Skënderbeu dhe Tirana janë pranë njëra-tjetrës në renditje. Mbetet një takim ku gabimet janë të ndaluara. E kemi marrë mesazhin nga ana e drejtuesve të klubit. Do të bëjmë çmos që të marrim fitore. Pavarësisht mungesave, ne i kemi elementët e duhur për të marrë një rezultat të mirë. Megjithëse Tirana po kalon një periudhë të mirë rezultatesh, Skënderbeu qëndron më lart. Jam i bindur se kthehemi te fitorja këtë javë”, mbylli prononcimin e tij kroati Pervan.