Sfidë delikate ndaj Teutës, Ahmataj "fsheh" formacionin
Mungesa e Rustem Hoxhës ka prishur planet
Luftëtari do të luajë të shtunën një ndeshje shumë delikate kundër Teutës së vendit të dytë. Ndaj durrsakëve ekipi bluzi fitoi në fazën e parë me shifrat 3-1 dhe këtë herë më shumë se kurrë do të kërkohet një tjetër triumf, në mënyrë që skuadra të shkëputet sa më shpejt nga zona e ftohtë e tabelës. Që të mposhtësh kundërshtarin e radhës, kërkohet impenjim maksimal. Me këtë moto trajneri Julian Ahmataj nisi seancën e djeshme stërvitore në orën 15:30. Ushtrimet aerobike me karakter shkrydhës të shoqëruara me lojën e kufizuar në kuadrate mes grupeve, i dhanë jetë gjithë seancës. Stafi teknik i bluzinjve ka lënë pas "hijen" e formacionit të pritshëm anti-Teutë. Ahmataj, më shumë se i kujdesshëm, gjatë seancës së djeshme përsëriste shpesh thirrjet: "Mos i krijoni mundësi kundërshtarit për të sulmuar. Sa më të shpejtë dhe të përqendruar në pasimin e fundit". Mungesa për shkak të kartonëve e qendërmbrojtësit Rustem Hoxha ia ka prishur planet trajnerit bluzi, i cili është i detyruar të ndryshojë formacionin ndaj Teutës. Ahmataj pret që edhe afrimet e janarit si Hanti, Uarden, Esin etj., të kapin ritmin dhe të jenë sa më të gatshëm. Nga blerjet e jan- arit, i vetmi që ka fituar for- macionin është greku Kocion- is, i cili debutoi me gol. Në seancën e së mërkurës, të diferencuar punuan portierët Ruçi, Bakaj dhe Qyrani, nën drejtimin e përgatitësit Jovan Mihajloviç. Ashtu si lojtarët, edhe ata morën minutat maksimale, të destinuara në daljet para zonës së vogël dhe ekzekutimit të goditjeve standarde.
ISH-TRAJNERI
- Për Theodhori Kallucin, një prej legjendave të gjalla të futbollit gjirokastrit, sfida me Teutën është shumë delikate. "Luftëtari do ta ketë të vështirë ndaj durrsakëve, pasi përballë kanë një skuadër solide me lojtarë të afirmuar. Është detyra e teknikut Ahmataj se si do të përgatisë skuadrën ndaj Teutës. Ky trajner ka injektuar në skuadër tjetër frymë dhe mënyrë loje. Rezultatet i japin të drejtë dhe duhet vlerësuar për çfarë ka arritur deri më tani. Në fushën tonë kërkohet tjetër strategji loje. Unë besoj se Ahmataj e ka gati armën e duhur për gjetur fitoren e parë në shtëpi", deklaroi dje Kalluci.