Duka voton për shpërblimet europiane, por në Shqipëri janë... mizerabël
Propozime dhe rritje çdo vit të të ardhurave, por ne njësoj si në 2002
Shumë gjëra kanë ndryshuar në futbollin shqiptar nga viti në vit. Diçka më mirë dhe diçka më keq, mund të gjenden pa fund ndryshime. Mirëpo, lehtësisht vihet re diçka që ka mbetur e çimentuar në vend: Shpërblimet për fituesit në kompeticionet që organizon FSHF. Por, habia më e madhe nuk qëndron në koprracinë e institucionit të futbollit për shpërndarjen e përfitimeve kundrejt fituesve.
HABIA - Pak ditë më parë, presidenti i FSHF-së është përzgjedhur me vota në Komitetin Ekzekutiv të UEFA-s, organin e dytë më të lartë vendimmarrës në qeverinë europiane të futbollit pas Kongresit. Habia qëndron në diferencën vendimmarrëse të kreut të FSHF-së për çfarë ndodh në vendin tonë në krahasim me arenën europiane. E dini pse? Armand Duka ka qenë një prej anëtarëve të komisionit që kanë propozuar, ideuar dhe hartuar kompeticionin e Ligës së Kombeve. Një risi për futbollin europian, që krijoi mundësinë e përballjeve të kombëtareve në një rrugë të dytë krahas kualifikueseve tradicionale, me shpërblimin për të fituar një vend në Europianin pasardhës.
- Gjithashtu, UEFA nga viti në vit propozon rritje të shpërblimeve për skuadrat pjesëmarrëse dhe fituese të kompeticioneve që ajo organizon. Po në vendin tonë? Ardian Takaj ka qenë një prej presidentëve që e ka ngritur vazhdimisht zërin për shpërblimet e ulëta që jep FSHF, mirëpo askush nuk e ka vënë "ujin në zjarr" për ta rishikuar këtë çështje. Madje, as kreu i FSHF-së, i cili tanimë do të jetë edhe në vendimmarrjen e lartë të UEFA-s. Jemi në vitin 2019 dhe skuadra që do shpallet kampione do të përfitojë po aq sa Dinamo, skuadra e parë kampione për FSHF-në nën drejtimin e Dukës.