Xhejms-Lejkërs, vetëm 5% shanse për “play-off”
Kriza e rezultateve në Perëndim dënon "Mbretin" e NBA
Shkurt dhe pastër do të quhej një faliment historik... Po flasim për Los Anxheles Lejkërsat jashtë zonës "play-off" të NBAsë, për më shumë në vitin e parë që pjesë e kësaj skuadre është bërë edhe mbreti i basketbollit amerikan dhe botëror, LeBron Xhejms. Dhe ai skenar që në Hollivud, deri në verën e kaluar, hipotetizohej si shakaja më e turpshme e të gjitha kohërave, aktualisht ekzistojnë të gjitha mundësitë që kjo të ndodhë dhe madje përqindjet janë shumë të larta. Në pritje që kampionati i basketbollit amerikan të rinisë pas "All Star Game", Los Anxheles Lejkërs renditen të dhjetët në Konferencën e Perëndimit, me 28 fitore dhe 29 humbje dhe me vetëm 4.9 për qind të mundësive që ata të bëhen pjesë e fazës me eliminim direkt. "E vetmja gjë që më intereson është të kuptojmë se çfarë duhet të bëjmë që të rikthehemi në garë për t'u kualifikuar për fazën 'play-off', nënvizon LeBron Xhejms. Në dy muajt e radhës, mendja ime do të jetë e fokusuar në një objektiv të vetëm: të marr për dore këtë skuadër dhe ta ringre në nivelin që po tregonte përpara dëmtimit tim".
Kriza - Diçka u thye kur për Krishtlindje, në fitoren që Los Anxheles Lejkërs arritën në shtëpinë e kampionëve në fuqi të Golde Stejt Uorriors, LeBron Xhejms pësoi një dëmtim në muskujt e brendshëm të kofshës së majtë. Ai që paralajmërohej fillimisht si vetëm një ndalesë e shkurtër, u shndërrua shumë shpejt në mungesën më të gjatë të karrierës së "Mbretit" të basketbollit. Ai që deri pak muaj më parë ishte quajtur gjithashtu "Njeriu prej çeliku", dominuesi i pakrahasueshëm edhe në moshën 34vjeçare dhe me 16 sezone mbi shpatulla, të thyhej si kristali dhe pas kësaj skuadra kaliforniane morri tatëpjetën. Madje, deri për Krishtlindje, Lejkërsat dukeshin si kandidati kryesor për të zbritur nga froni Golden Stejtin, por pas dëmtimit kjo ëndërr u shua, sepse 12 humbjet në 18 ndeshjet pa Xhejmsin në fushë e dërguan në pikiatë skuadrën. Gjithsesi, basketbollisti 34-vjeçar e ka gati recetën: "Për të ngjitur shkallët në renditje dhe me shpresën se do të mund të kapim zonën 'play-off' duhet të rinisim që të dëfrehemi në fushë, të luajmë si një skuadër dhe të mos shohim renditjen, ndryshe do t'i shtojmë presion vetes"
Mision i pamundur - Duke u dëfryer apo duke fituar me çdo kusht, misioni i Los Anxheles Lejkërsave duket shumë i vështirë. Ata janë skuadra që sipas llogarive kanë kalendarin e nëntë më të vështirë nga të gjitha pjesëmarrëset dhe objektivi është që të parakalojnë në javët e mbetur Klipërsat dhe Kingsat, të cilët presin beteja shumë herë më të lehta sesa kalifornianët. Lajmi i parë pozitiv është se LeBron Xhejms është gati dhe të tërheqë shokët e skuadrës, por ai ka nevojë edhe për ndihmën e shokëve të tij dhe normalisht edhe për tifozët, nëse Los Anxheles Lejkërs nuk duan që t'i shohin "play-off"-et e NBA-së nga divani i shtëpisë për të gjashtin sezon radhazi. Apo akoma më shumë, vetë LeBron Xhejms të bëhet pishman që zgjidhi transferimin në Hollivud, i cili mund ta lërë jashtë finaleve, një "takim me koshin" në të cilin nuk mungonte që prej vitit 2005. Dhe sipas llogarive të bëra, mundësia që Lejkërs të shkojë në fazën e finaleve është vetëm 4.9 për qind, kur atyre u kanë mbetur për të luajtur edhe 25 ndeshje deri në fund të sezonit. Gjithsesi, fjalë e "pamundur" në sport nuk ekziston, aq më shumë kur mund të mbështetesh te "Mbreti" Xhejms...