Lacio s'korrigjon dot gabimin, Napoli dhe Hysaj gati për turin tjetër
Liga e Europës vazhdon pa Strakoshën e Berishën
3-1 në ndeshjen e parë në Zvicër e bën më të qetë Karlo Ançelotin për sfidën e sotme ndaj Zyrihut. Trajneri kërkon kalimin e turit në një kompeticion ku do të kërkohet trofeu, si e vetmja mënyrë për të shpëtuar sezonin. Karleto gjithsesi e gjykon pozitive ecurinë e të tijve, teksa dje në konferencë për shtyp deklaroi: "Skuadra deri më sot meriton notën 7. Nuk mendoj se jemi të kualifikuar sepse mungojnë ende 90 minuta, ndaj duhet të jemi të qartë në fushë duke mos vënë për asnjë moment sfidën në diskutim. Një gol i tyre në minuta e parë do të rihapte gjithçka. Do të bëj disa ndryshime, sepse të gjithë e meritojnë të luajnë. Jam veçanërisht i kënaqur nga paraqitjet e futbollistëve të krahut. Hysaj po bën mirë, por gjithashtu Malkuit dhe të tjerët. Në kampionat na ka munguar goli, ndaj kjo e nesërmja (sotmja) mund të jetë një mundësi e mirë për të rigjetur marrëdhënien me portat kundërshtare".
Dje u luajt sfida mes Sevijës dhe Lacios, e vlefshme për ndeshjen e kthimit të 1/16-ave të Ligës së Europës. Bardhekaltrit u shfaqën disi të ndrojtur për shkak të humbjes në "Olimpico" (0-1), por jo të dorëzuar. Shanset e skuadrës së Thomas Strakoshës u komprometuan në minutën e 20-të kur Ben Jeder gjeti kohën për të mundur shqiptarin. Sarabia goditi nga jashtë zonë, teksa grushtimi i keq i portierit mundësoi goditjen e Ben Jeder.
Miqtë vazhduan të sulmonin duke pasur disa raste. Më të pastrin e pati Açerbi, por Vaçlik bëri një mrekulli duke e ndaluar. Në minutën e 60-të, Franko Vazkez mori kartonin e dytë të verdhë të mbrëmjes duke ndezur disi shpresat e Lacios, të cilat u shuan përfundimisht
në minutën e 71-të, kur Adam Marusiç doli me karton të kuq pas një goditjeje me bërryl kundër Mesas. Gjashtë minuta me pas Sarabia vulosi gjithçka duke shënuar golin e dytë për Sevijën që hipotekoi kualifikimin për të zotët e shtëpisë.
NOTAT - Teksa Riza Durmishi u vlerësua me 6 për kontributin e tij në 15 minutat e fundit të ndeshjes, Tomas Strakosha doli nga "Sançez Pizhuan" me një 5.5. Sipas "Corriere Dello Sport": Në rastin e golit të parë faji i Strakoshës ndahet me mbrojtjen që i la shumë hapë- sirë Sarabias për të goditur nga distanca, megjithëse shqiptari nuk bëri më të mirën me atë grushtim që u shfrytëzua nga Ben Jeder. Pa faj në golin e dytë kur Navas e Sarabia e fusin mes për golin që vulos përfundimisht eliminim e Lacios nga Liga e Europës.