Krisje mes Perezit dhe trajnerit, Solari: Nuk e ndryshoj filozofinë

Përplasje mes palëve për Iskon dhe Marselon

Është momenti më delikat i sezonit, aty ku përcaktohen objektivat dhe kërkohet një sforco nga të gjitha palët për të mos dështuar. Florentino Perez e di mjaft mirë këtë gjë dhe ka darkuar me trajnerin e skuadrës Santiago Solari. Në një darkë që ka zgjatur më shumë se dy orë, presidenti i klubit të Realit dhe numri një i stolit kanë biseduar për ecurinë e deritanishme dhe gjithashtu kanë folur për planet e së ardhmes. Në skuadër ka disa çështje që duhen zgjidhur dhe Perez ka kërkuar që trajneri i tij të jetë më diplomat dhe ta menaxhojë mirë skuadrën. Ai i ka shprehur vlerësimet deri diku për rezultatet e arritura në këtë fazë të sezonit, por kërkon që të gjithë të jenë më të vëmendshëm në këto momente ku vendoset fati i sezonit. Përveç diskutimeve të përgjithshme është folur edhe për emra të veçantë si Isko, Marselo apo Vinicius. Për këtë të fundit, Perez ka përgëzuar trajnerin që ka arritur ta shndërrojë në një lojtar të rëndësishëm për ekipin madrilen. Për dy të parët, presidenti "galaktik" ka pasur rezerva dhe mendon se Solari të jetë i kujdesshëm për të ruajtur grupin e paprekur dhe shpirtin e skuadrës. Por, këtu duket se ka qenë trajneri Solari, i cili i është kundërpërgjigjur presidentit duke i thënë se nuk heq dorë kurrë nga bindjet dhe idetë e tij në lidhje me futbollin. Në njëfarë mënyre i ka lënë të kuptohet se ai do të vazhdojë me vendimet e forta për të lënë jashtë Marselon dhe Iskon në të mirë të skuadrës dhe arritjes së rezultateve pozitive. Madje trajneri ka qenë i ndërgjegjshëm kur i ka thënë presidentit që është i vetëdijshëm se dështimi dhe rezultatet e këtij momenti mund të përcaktojnë fatin e tij për të ardhmen. Reali është në gjysmëfinalen e Kupës së Mbretit, ka fituar në ndeshjen e parë të fazës së 1/8-ave të Champions-it dhe ndodhet -9 nga Barcelona pas humbjes së fundit me Gironën.