“Për Dorianin”, biletat do shkojnë për kurimin e të riut
Skënderbeu po tregon gjithnjë e më shumë se është një klub i madh. Pavarësisht se rezultatet në këtë sezon nuk janë ato të viteve të fundit, sërish klubi bardhekuq ka gjetur mundësinë që të tregojë organizimin dhe ndjeshmërinë për rastet që kërkojnë ndihmë dhe përkrahje. Rasti i fundit është ai i 17-vjeçarit Dorian Tahirllari, i cili është diagnostikuar me tumor në rruazat e shtyllës kurizore dhe në stomak. A ka nevojë për ndërhyrje kirurgjikale që kushton shumë. Duke parë edhe gjendjen financiare të familjes që nuk mund të përballojë shpenzime të mëdha për operacionin, klubi i Skënderbeut ka ndërmarrë nismën “#përDorianin”. Në këtë mënyrë të gjithë të ardhurat që do të mblidhen nga biletat e ndeshjes së sotme do të shkojnë në ndihmë të të riut, i cili është edhe pjesë e Skënderbeu U-17. Kjo nismë është një arsye më shumë që sot stadiumi të jetë i tejmbushur. Nga të dhënat zyrtare flitet për afro 2000 bileta deri pasditen e së enjtes. Një shifër jo fort e lartë, për një kauzë kaq të madhe. Ndaj shpresohet që sot interesi të jetë në rritje.