Mbrojtja, garancia e Kamzës për Kukësin

Pas emërimit të trajnerit të ri, Gentjan Stojku, Kamza ka vijuar normalisht stërvitjet për takimin ndaj Kukësit. Siguria për këtë takim, ku kërkohet minimumi një pikë në transfertë, pritet të vijë nga mbrojtja. Në një prononcim të shkurtër për “Panorama Sport”, dyshja e mbrojtjes, Orjad BeqiriHarallamb Qaqi, pranojnë vështirësitë ku ndodhet ekipi, por optimizmi nuk mungon për pjesën në vazhdim. BEQIRI- “Ndeshja kundër Kukësit nuk është e njëjtë si ndaj Kastriotit, duke qenë se ndaj krutanëve ishim nën presionin e pikëve dhe ishte një rival direkt për mbijetesë. Ndryshe nga ky takim, me Kukësin e shikoj ekipin më të motivuar, pasi luajmë kundër një pretendenti për titull. Ne na duhen pikët, por edhe ata do të jenë në kërkim të fitores dhe mendoj se skuadra duhet të luftojë për ta shfrytëzuar këtë moment të vështirë të kësaj skuadre”, u shpreh mbrojtësi Orjad Beqiri. QAQI- Qendërmbrojtësi Harallamb Qaqi erdhi te Kamza gjatë merkatos së dimrit në huazim nga Kukësi, ndaj për atë është një ndeshje e veçantë. Lidhur me këtë takim, Qaqi u shprehe: “Humbja ndaj Kastriotit ka qenë e paparashikuar, një humbje kurrë nuk e prisnim. Ne ishim nën një presion pikësh dhe kërkohej medoemos fitorja, duke i llogaritur gjërat ndryshe. Gjithsesi, ne nuk do të dorëzohemi, pasi kampionati ka akoma shtigje dhe shumë ndeshje për të rikuperuar. E shoh si një garë të fortë deri në fund. Ne do bëjmë maksimumin, duke e nisur mbarë që me Kukësin. Fillimisht, kjo do të jetë një sfidë midis dy skuadrave të ekstremit, por lidhur me mua personalisht do të jetë një sfidë emocionale, duke qenë një ish-lojtar i Kukësit. Pavarësisht nga kjo, unë kam dëshirë ta fitoj këtë ndeshje”.