“Mëkatet” e Besës, lojtarët kërkojnë falje

Miraka: Disa takime i llogarisnim si fitore pa luajtur

Festim Miraka është pa dyshim lojtari që dallon nga të tjerët te Besa. Si një profesionist i vërtetë, ai është i pari që zbret në fushën e stërvitjes dhe punon fort. Kjo e bën atë edhe pikë referuese të Besës, duke e shpëtuar jo pak herë nga gola të sigurt.

MIRAKA

I pyetur nga "Panorama Sport" mbi fatet e kavajasve në fazën e tretë, Miraka thotë: "Nëse ka një ekip që ka pësuar humbje apo barazime të pamerituara në shtëpi, kjo është Besa. Them kështu, pasi qoftë në kualitete qoftë në lojë, kemi qëndruar në çdo sfidë mbi kundërshtarët. Ka ndodhur kështu, pasi shumë prej nesh përballjet me Pogradecin apo Orikumin i quanin fitore akoma pa nisur ndeshjet dhe bënin llog- ari pikësh. Për pak e pësuam edhe me Elbasanin po në Kavajë, ku fituam minimalisht. Nuk e meritonim të linim këto pikë, por ja që kemi marrë mësimin që s'e kemi harruar. Ndaj them se përpara kemi një ndeshje me Turbinën, ekip i cili nuk ka se çfarë të humbasë në Kavajë. Presioni mbi fitoren qëndron mbi ne, pasi na duhet patjetër. Për momentin jemi të përqendruar te ndeshja e radhës dhe po punojmë për ta fituar atë. Dhe kjo do të ndodhë duke mos përsëritur gabimet që kemi bërë. Duhet të garantojmë ndeshjen me lojë e gola, pastaj mund të flasim për fazën e tretë. Nuk ka dhe nuk mund të ketë asnjë takim të fituar në letër, por vetëm në fushë me sakrificë, futboll e korrektësi. Kryesorja është ta mbyllim fazën e dytë me fitore. Kjo edhe si një vlerësim për tifozët tanë që rikthehen", thotë fillimisht Miraka. Përtej kësaj, portieri nuk e mohon faktin se që nga presidenca, stafi dhe lojtarët synim kryesor kanë kthimin në Superiore. "Objektivi ynë është shpallur që në javën e parë të kampionatit dhe do të mbetet në fuqi deri në realizimin e tij. Por sikurse citova më lart, personalisht preferoj t'i marr ndeshjet një e nga një. Në futboll çfarë nuk ndodh dhe mjafton një humbje të të prishë punë. Besa do t'i marrë ndeshjet një e nga një, duke ia bërë hyzmetin secilës kur t'i vijë koha", përfundoi Miraka.