Tri mungesa për shkodranët, zbardhet formacioni

Vllaznia do të kërkojë që ta mbyllë në mënyrën më të mirë të mundshme fazën e dytë të sezonit. Tekniku Lika po përgatit formacionin më të mirë të mundshëm për të kaluar me sukses ndeshjen ndaj Ilirisë. Nga sa mësohet, në këtë takim do të mungojë dyshja e mbrojtjes Renato Malota e Antonio Marku. Një tjetër mungesë është edhe ajo e kapitenit Gilman Lika. Lika shpresohet që të rikuperohet për fazën e tretë të këtij kampionati. Për shkak të mungesave, tekniku Lika ka skicuar edhe formacionin e mundshëm që do të jetë në fushën e lojës në takimin e së shtunës. Po ashtu, nisur edhe nga mungesa që do të ketë në repartin e mbrojtjes, pritet që këtë takim të kthehet sërish me një skemë me katër lojtarë. Ai ka skicuar edhe 11-shin e lojtarëve që do të startojnë këtë sfidë, ku në repartin difensiv do të jenë katërshja e përbërë nga Gurishta e Gocaj në krahë e Zeqja e Ignat në qendër. Si gjithmonë, në portë është Alen Sherri. Mesfusha do të përbëhet nga Krymi, Tafili e Kruja. Ndërsa në dy krahët në ndihmë të sulmuesit brazilian, Xhunior, do të jetë dyshja Zogaj e Hajdari. Me këtë formacion, Vllaznia ka arritur që të marrë një fitore të thellë në përballjen e një jave më parë, atë ndaj Vorës. Këtë do të kërkojë që ta bëjë edhe në ndaj skuadrës fushë-krujase.