Pogradeci, një makth për Lushnjën
Verdhejeshilët do kërkojnë të thyejnë tabunë, ekipi e ka siguruar 5-shen e parë
Lushnjarët vijojnë të përgatiten në kuadrin e ndeshjes me Pogradecin, që do të luajnë nesër në orën 14:00, në stadiumin “Gjorgji Kyçyku”. Te Lushnja janë të konfirmuara mungesat e portierit kryesor Ibrahim Bejte dhe mesfushorit Eneo Sulkja për arsye dëmtimi. Ndërkohë që në dyshim janë mbrojtësi i krahut të djathtë, Renato Dervishi, dhe mesfushori Ergys Alushi, që u dëmtuan në ndeshjen me Besën.
PRECEDENTËT
Lushnja nuk fiton prej 26 vjetësh në Pogradec. Për herë të fundit, verdhejeshilët kanë triumfuar në “Gjorgji Kyçyku”, në sezonin 19921993, kur kanë mundur Pogradecin 3-2. Atëherë, skuadrat luanin në Kategorinë Superiore. Në pesë sfidat e fundit, tri barazime dhe 2 fitore për Pogradecin. Lushnjarët do të grumbullohen për transfertën me Pogradecin. Skuadra verdhejeshile do të udhëtojë që sot drejt qytetit liqenor. Lushnja luan 90 minutat e fundit të fazës së dytë, ku synohet fitorja për të ruajtur distancat me kreun. Lushnja e ka marrë seriozisht ndeshjen. Për herë të parë në këtë sezon, klubi grumbullon skuadrën një ditë para ndeshjes.
SKUADRA
Lushnjarët janë përgatitur maksimalisht gjatë gjithë javës për ndeshjen që do të luajnë nesër në Pogradec. Trajneri Ilir Gjyla ka dhënë udhëzimet e rastit për lojtarët e tij, ndërsa ka punuar më shumë në aspektin mbrojtës. Lushnja, një javë më parë, fitoi me rezultatin 2-0 ndaj Besës, duke siguruar në këtë mënyrë 5-shen e parë të grupit. Edhe pse skuadra ka diferencë me vendin e parë, që është Bylisi, në Lushnjë kanë deklaruar se do të japin gjithçka në fazën e tretë. Në një prononcim për gazetën, një ditë më parë, trajneri Ilir Gjyla tha se verdhejeshilët nuk i kanë borxh asnjë skuadre dhe se do të japin maksimumin në çdo sfidë.
INFRASTRUKTURA
Fushat e stërvitjes janë një
problem për skuadrën. Ekipi nuk ka një terren në kushte normale që të zhvillojë seancat stërvitore, të cilat i kryen në stadium. Një çështje që është ngritur disa herë si shqetësim, por që nuk ka marrë zgjidhje. Pritet që Bashkia e Lushnjës të subvencionojë një shumë të konsiderueshme për sa i përket infrastrukturës që skuadra të ketë një fushë ku të zhvillojë normalisht seancat stërvitore. Gjithashtu, edhe fusha e stadiumit është në kushte shumë të vështira dhe duhet ndërhyrje për ta sjellë në kushte sa më normale.