Sprinti për titullin, ja si Bajerni fut në stres Dortmundin
Kovaç kërkon trofeun, skuadra e Favresë lëkundet
Tifozët e Borusias së Dortmundit kujtojnë shumë mirë sezonin 2011-2012. Verdhezinjtë kryesonin pas 22 javësh kampionatin me tri pikë më shumë. Atëherë, në vendin e dytë renditej Gladbah. Kjo ka qenë hera e fundit në këto vite që kampionati ishte kaq i hapur 12 javë para përfundimit. Bajerni ka pasur në sezonin 2013-2014 distancën më të madhe nga ndjekësit në javën e 22. Nën drejtimin e Pep Guardiolës, bavarezët ndodheshin 19 pikë larg me 62 gola të shënuar. Sigurisht që për shifra të tillë nuk mund të flitet më. Gara është e hapur me të ndjekur që janë kthyer në ndjekës. Hera e fundit që verdhezinjtë shijuan triumfin ishte në sezonin 2011-2012 nën drejtimin e Jurgen Klop. Borusia fitoi kampionatin me 81 pikë, një rekord ky për klubin. Edhe pse momentalisht ata ndodhen në një moment jo të mirë, në Vestfahlen shpresojnë të ruajnë kryesimin ndaj Bajernit që ka rikuperuar shumë pikë në këto javë të fundit, duke përfituar edhe nga "ngecja" e verdhezinjve. "Nuk do të ndryshojmë stilin e lojës sonë. Shumë skuadra të mira në Europë përjetojnë faza të tilla", u shpreh mesfushori Aksel Vitsel pas barazimit ndaj Nurembergut në fundjavë.
KOVAC RRIT PRESIONIN
Bajerni e ka hedhur pas krahëve këtë fazë të keqe të sezonit dhe tani janë më të sigurt në lojën e tyre. 9 nga 10 ndeshjet e fundit bavarezët arritën t'i fitonin. Kjo bëri që distanca me Borusian të shkurtohej ndjeshëm. Një fitore ndaj Hertës të shtunën do të barazonte me pikë skuadrat të paktën për 26 orë. Verdhezinjtë zbresin në fushën e lojës të dielën ndaj Leverkusen. Por në dorën e kujt është titulli? Bajernit apo Borusias. Një përgjigje natyrale të çon te verdhezinjtë. Vetëm ata mund ta humbasin atë. Detyra e Bajernit
është të përfitojë sa më shumë nga gabimet e kryesuesve, të paktën derisa të marrë kryesimin nëse diçka e tillë do të ndodhë. Më Borusian do të ketë shumë pak shanse për të festuar në maj. Festë që bavarezët e kanë bërë pronën e tyre për gjashtë sezone radhazi.
Trajneri Lusien Favre shpreson në një rikthim të kapitenit Rojs në ndeshjen e radhës ndaj Aspirinave. Sulmuesi i ka munguar jo pak skuadrës në dy 3 ndeshjet e fundit. Thatësira në sulm ka sjellë shumë pak pikë në skuadër. Pikë titulli.