Shehi: Është gjynah që mundemi në këtë mënyrë
Nuk kishte si të mos ishte i zhgënjyer trajneri i Skënderbeut për rezultatin e ndeshjes së djeshme. Për “SuperSport” Orgest Shehi shpreh keqardhje për mënyrë sesi ekipi pëson gola në një kohë që kanë punuar shumë, por sipas tij ndikoi edhe mospasja e mbrojtësve të mirëfilltë. Megjithatë, ai mendon se i ka penalizuar edhe moseksperienca, ndaj do të vazhdojë të punojë më të rinjtë për t’i ingranuar sa më mirë më skuadrën.
Tjetër humbje, e cila këtë herë është shumë e rëndë...
Zhgënjimi është prezent. Të humbësh një ndeshje të tillë, të vjen keq. Kundërshtari na erdhi 1 herë e gjysmë në portë. I marrim golat shumë lehtë. Sidomos goli i dytë. Ushtruam presion, luajtëm gjatë gjithë kohës në fushën e Tiranës, por dalja e Abazit na çorientoi fare. Mbetëm me 1 mbrojtës. Na prishi punë, pasi u prishën ekuilibrat. S’kishim mundësi të tjera, sepse ata lojtarë kishim. Samboun s’mund ta hidhja në fushë, për shkak se bëheshin 5 të huaj.
Pse skuadra i merr kaq lehtë golat?
Është për të ardhur keq. Ne kemi punuar. Goli i dytë është vendosje gabim plus edhe shumë të lehtë në driblim. Mospasja e mbrojtësve të mirëfilltë ndikon.
Pse Skënderbeu ka filluar lojën pas minutës së 26-të?
Fillimi i ndeshjes ishte i vështirë. Kishim mundësinë për ta nisur lojën nga poshtë. Pëllumbi kishte mundësi, por nuk merrte shumë përsipër. Radasi u bllokua. Goli është komplet i evitueshëm, është gjynah. Më vjen keq. Në këndvështrimin tonë nga pankina, kjo ishte një nga arsyet.
Goli i pësuar në zonën e vogël të portierit për të disatën herë…
Kundërshtarët rrinë lirshëm në zonën tonë, vetëm ne mund të pësojmë ashtu golash. Mbrojtësit duhet të jenë të ashpër dhe jo në ato zona. Ndoshta mospasja e mbrojtësve të mirëfilltë në atë repart dhe neglizhenca e situatave bëjnë që të pësojmë gol.
Nëntë ndeshje 8 humbje, çfarë duhet të bëjë skuadra?
Është një situata jo e mirë mbas gjithë këtyre ndeshjeve që nuk marrim rezultat. Përgjegjësinë e parë e marr unë. Duhet të rrimë të gjithë mbrapa dhe të luajmë kundërsulm. Prodhojmë shumë lojë dhe më pas pësojmë. E gjithë puna që bëjmë na shkon dëm. Duhet të zgjedhim lojtarë që të mbrojnë dhe të mos e kenë mendjen te sulm.
Në ndeshjen e radhës ndaj Teutës do t’ju besoni të rinjve?
Sigurisht që do t’iu besoj të rinjve. Do t’i mëshoj fort kësaj. Duhet të ingranohen më shumë me skuadrën. E di që është një risk i madh. Nga moseksperienca realisht jemi ndëshkuar. Ne këta lojtarë kemi në skuadër, këta do të vazhdojnë të marrin besim, edhe pse kostoja është e madhe për mua, pasi nuk po marrim rezultate.