Ngo: I “propozova” si burrë Memës, duhet të mbyllnim më parë takimin
Sulmuesi rezulton vendimtar për bardheblutë
Majkëll Ngo është “terminatori” i Tiranës. Prej këmbëve të tij erdhi goli i parë i Kobinës. Ishte ai që shënoi golin e dytë dhe të fitores 16 sekonda nga fundi i lojës. Në “Gol pas goli” të “SuperSport”, shtatlarti i bardhebluve foli për të tashmen dhe të ardhmen. Sigurisht, dy fjalë edhe për “dashurinë” e tij me Ardian Memën...
Shënoni sërish dhe i jepni tri pikë Tiranës, a ndiheni sikur po ktheheni lideri i këtij ekipi?
Po, unë ndihem shumë i lumtur për situatën që po kaloj dhe golat që po shënoj për skuadrën. Ishte një fitore e rëndësishme, por duhet të mësojmë nga këto ndeshje me Skënderbeun, pasi kishim shumë raste ku duhet ta kishim mbyllur takimin. Jam i kënaqur në përfundim se morëm
tri pikë të rëndësishme.
Në 25 minutat e para Tirana dominoi, por më pas ndryshoi ritmi. Sa i kënaqur jeni me lojën që zhvilluat në Korçë?
Duhet të mësojmë nga kjo ndeshje, pasi përpara kemi një sfidë të vështirë. Nuk jam i kënaqur. Në 25 minutat e para ushtruam presion mbi kundërshtarin, më pas skuadra nisi të tërhiqet prapa duke i dhënë hapësirë Skënderbeut. Kjo erdhi edhe për meritë të kundërshtarit që ka lojtarë të mirë. Kur i jep hapësira kundërshtarit, bëhet më e vështirë. Kur jemi përpara, jemi më të rrezikshëm për kundërshtarët. Gjithsesi, kjo ndeshje është një mësim për ne, që vjen para një sfide shumë të vështirë dhe të rëndësishme për ekipin ku duhet të bëjmë më shumë.
Kemi dëgjuar se drejtuesit ju kanë ofruan një rinovim të kontratës me Tiranën, do të vazhdoni me bardheblutë?
Nuk e kam dëgjuar këtë lajm, askush nuk më ka folur për këtë gjë. Gjithçka varet nga presidenti dhe do të flas për të ardhmen time. E konsideroj si një lajm të mirë këtë që po më thoni, ndonëse jam i fokusuar të bëj më të mirën për ekipin. E shikoj si një lajm të mirë, pozitiv dhe në drejtimin e duhur. Jam i kënaqur nga kjo që po dëgjoj.
Çfarë ka ndodhur mes jush dhe Memës që e keni rregulluar marrëdhënien, pasi nga kontradiktat ka lindur një “dashuri” e re mes palëve?
Duhet t’i “propozoja” i pari, sepse unë jam burri. I kam “propozuar” trajnerit Mema dhe kam marrë një “po” (qesh). Kjo është në kontekstin e shakasë. Gjithmonë, në një marrëdhënie, madje edhe mes bashkëshortëve burrë-grua, ka ulje-ngritje. Gjithsesi, marrëdhënia jonë është shumë e mirë dhe kontradiktat janë shuar.