Ahmataj ka gati “recetën”, por kërkon një dorë nga... tifozët
Trajneri i Luftëtarit: Teuta meriton respekt, ne luajmë për fitoren
Julian Ahmataj kërkon fitoren e parë si trajner i Luftëtarit në Gjirokastër, pikërisht kundër Teutës, ku dhe ka nisur karrierën në trajning. Kreu i pankinës bluzi debutoi me një triumf në Laç, ndërsa më pas skuadra gjirokastrite barazoi pa gola në shtëpi ndaj Flamurtarit dhe 1-1 në transfertë ndaj Tiranës. Sot në orën 14:00 në stadiumin "Gjirokastra" do të kërkohet fitorja, si e vetmja alternativë për t'u distancuar nga zona e ftohtë. "Teuta meriton respekt. E vlerësojmë për atë që ka dhënë aktualisht, pasi ka një skuadër të fortë dhe për më tepër me pretendime madhore. Por, kjo s'do të thotë se duhet ta mbivlerësojmë. Në fushë futemi për të marrë rezultat maksimal. E rëndësishme është të bëjmë atë që kemi bërë gjatë gjithë javës në stërvitje. Gjithmonë stërvitemi për të fituar para çdo kundërshtari", ka thënë dje Ahmataj për "Panorama Sport". SITUATA Luftëtari do të vuajë sot mungesën e qendërmbrojtësit Rustem Hoxha, i cili ka plotësuar numrin e kartonëve të verdhë. "Na mungon një lojtar si Hoxha, por te Luftëtari të gjithë janë të rëndësishëm. Jemi skuadër grupi, ku të gjithë kanë kontributin e tyre dhe askush nuk është i pazëvendësueshëm. Është e logjikshme që do të ketë ndryshime në formacion, gjithnjë në dobi të rezultatit pozitiv. Për të arritur shkuar te fitorja, duhet që të gjithë lojtarët të jenë të kujdesshëm në çdo moment të lojës", theksoi kreu i pankinës bluzi, i cili sipas të gjitha gjasave do të spostojë Oltion Rapën në vendin e Hoxhës. MBËSHTETJA Trajneri i gjirokastritëve kërkon mbështetjen e tifozëve ndaj Teutës, pasi sipas tij skuadra do të japë shpirtin në fushë. "Ndeshjet luhen për tifozët dhe këtu në Gjirokastër ata jetojnë me futbollin. Me mbështetjen e tifozërisë, lojtarët do të jenë shumë herë më të lirshëm në fushë për të dhënë maksimumin. Jam i bindur se do të shpalosin cilësitë e tyre më të mira. Luftëtari s'ka për të rrezikuar, përkundrazi do të bëjë më mirë në të ardhmen. Po rritet një brez shumë i mirë dhe me perspektivë. Do të duhen ditë dhe orë pune që Luftëtari të korë frytet. Tifozëria e Luftëtarit meriton shumë, prandaj dhe them se me mbështetjen e tyre, kemi për mision të vetëm rezultatin pozitiv ndaj Teutës", përfundoi Ahmataj, i cili ka për synim shpëtimin e sezonit të Luftëtarit, duke arritur së paku qëndrimin në Superiore.