Ribaj: Flamurtari merr pikë

“Klubi e ka grupin për të zëvendësuar largimet, për pikë në kryeqytet”

Flamurtari nuk do të dalë pa pikë nga transferta e Tiranës”. I këtij mendimi është sulmuesi i Flamurtarit, Andi Ribaj. Pavarësisht vështirësive, Ribaj premton se skuadra do të japë maksimumin ndaj Partizanit. Sulmuesi i dha epërsinë Flamurtarit në fitoren 2-0 kundër Skënderbeut në javën e kaluar dhe duket se ka rigjetur veten. Ribaj shpreson të jetë deciziv për vlonjatët edhe në ndeshjet e tjera, duke nisur nga Partizani. Në konferencën e djeshme për shtyp, Ribaj ka deklaruar se pas golit është çliruar dhe premton maksimumin edhe në takimin e sotëm. “Ndihem i lumtur për golin që i shënova Skënderbeut. Goli e çliron çdo lojtar. Do të vazhdoj të bëj punë time sa më të mirë, të luaj dhe do të mundohem të shënoj sa më shumë. Partizani është ekipi më i mirë për momentin. Në këto kushte ne e kemi vlerësuar maksimalisht takimin. I kemi marrë të gjitha masat që të arrijmë një rezultat pozitiv nga kjo përballje. Them se do të realizojmë këtë gjë”, tha fillimisht sulmuesi. Dy ditë më parë, Idriz Batha, ish-kapiteni i Partizanit, ka postuar një video në “Instagram” ku shfaqet Lejdi Liçaj duke bërë “magji” për ndeshjen e sotme. Ai madje parashikoi edhe sfidën, ku shprehet: “0-1, kundërsulm me gol të Ribajt”. Për këtë besëtytni sulmuesi fierak u shpreh: “Ishte një shaka e momentit, shpresoj të dalë edhe ajo batutë e Lejdit”.

LARGIMET - Flamurtari ka pasur shumë largime në nisje të këtij viti kalendarik, dy të fundit ishin Agustin Torasa dhe Albi Alla. Andi Ribaj ka bindjen se Flamurtari ka kontingjentin e lojtarëve për të zëvendësuar largimet. “Ka pasur largime, kjo dihet. Besoj se do i zëvendësojmë ato, pasi Flamurtari e ka grupin”, tha sulmuesi. I pyetur për çështjen e financave dhe pagat e padhëna, si dhe për frymën në ekip pas kësaj situate, sulmuesi 29-vjeçar u shpreh: “Kemi një frymë shumë të mirë në grup. Djemtë janë shumë entuziastë. Për problemet e tjera përgjigjen drejtuesit”.