Elvi Berisha trondit Laçin, jashtë fushave mbi një muaj

Mesfushori i talentuar, Elvi Berisha, do të mungojë gjatë për Laçin. Një përplasje me Trashin e Partizanit gjatë ndeshjes së fundit ka bërë që i riu të dëmtohet rëndë dhe tashmë do t'i duhet minimalisht gjashtë javë për t'u riaftësuar. Si për ironi të fatit, mesfushori me tipare sulmuese, i ardhur te Laçi në verën e vitit të kaluar, u dëmtua në momentin e tij më të mirë. 19vjeçari konfirmoi edhe vetë përmes një postimi në rrjetet sociale se do të qëndrojë jashtë fushave 4 deri në 6 javë. "Rrëzohesh shtatë herë dhe ngrihesh tetë. 4-6 javë jashtë fushave", shkruante Berisha. Ky dëmtim ia prish jo pak planet trajnerit Besnik Prenga, i cili po improvizon jo pak në fazën ofensive, aty ku lojtarët e ardhur gjatë merkatos së janarit ende nuk janë ambientuar me grupin. Ky sezon po rezulton i pafat për disa lojtarë te Laçi, pasi Berisha nuk është i pari që dëmtohet. STËRVITJA Nesër Laçi do të luajë në transfertë ndaj Kastriotit. Përveç Berishës së dëmtuar dhe njëkohësisht të pezulluar për këtë javë prej kartonëve, trajneri Prenga do të ketë të gjithë pjesën tjetër të grupit në dispozicion. Tri ditë më parë u kthyen në stërvitje edhe lojtarët që munguan ndaj Partizanit. Abdurrahman Fangaj, Denis Pjeshka dhe sulmuesi nigerian, Antoni Okputo, do të jenë gati për nesër. Nga ana tjetër, mesfushori kroat, Ivan Galiç, si dhe mbrojtësi i majtë, Irlian Ceka, vazhdojnë të stërviten me një ngarkesë më të ulët se pjesa tjetër e grupit. Dëmtimet që kanë pësuar në gju, i pari në fillim të sezonit dhe i dyti vetëm një muaj më parë, kanë bërë që të jenë disi mbrapa dhe do të duhet kohë që të kapin ritmin. Gjithsesi, e sigurt është që të dy do të jenë një forcë e shtuar në vazhdimësinë e sezonit. Ceka është pjesë edhe e Kombëtares U-21, teksa vjen pas eksperiencës me të rinjtë e Lacios. Mbrojtësi i majtë ka nisur stërvitjen me kurbinasit që në dhjetor, por u dëmtua në janar.