Herald Marku: Ja pse Kastrioti mbijeton në elitë

Kastrioti do të synojë triumfin e radhës, këtë herë ndaj Laçit në fushën e stadiumit "Niko Dovana". Klubi krutan do të jetë pritës në Durrës për shkak të dënimit të fushës, por kjo nuk i step lojtarët e Kastriotit. Ai që po shfaq formë të mirë në skuadrën krutane në këtë pjesë të dytë të sezonit është edhe mesfushori Herald Marku. 22-vjeçari është njëri ndër lojtarët kryesorë, madje duke arritur që të jetë protagonist në disa ndeshje. Në prag të përballjes me kurbinasit, ai flet për "Panorama Sport" në lidhje me gjendjen aktuale të skuadrës, ndeshjen me Laçin dhe synimet e krutanëve për vazhdimësinë. Mesfushori - "Që nga fillimi javës kemi punuar intensivisht edhe gjendja emocionale e ekipit ka qenë shumë e mirë pas fitoren me Kamzën, i cili është një kundërshtar direkt. Kjo fitore na bëri që stërvitja gjatë gjithë javës të ishte me një harmoni të plotë. Mënyra se si po i zhvillojmë ndeshjet, stërvitjet, harmonia që ka grupi. Është kjo besoj fryma e grupit që më bën të mendoj se ne do qëndrojmë në kategori", ka thënë fillimisht Marku, për t'u futur direkt në temën e ndeshjes së radhës. "Është një sfidë shumë e vështirë, pasi të gjithë e njohim ekipin kurbinas. E kemi vlerësuar maksimalisht, duke ditur tashmë pozicionin ku jemi, çdo ndeshje për ne është si një finale dhe çdo përballje ka specifika të ndryshme përgatitjeje për t'iu përshtatur kundërshtarit që ne luajmë. Ka qenë një javë intensive përgatitjesh, si nga ana fizike dhe ajo taktike dhe besoj se do të jemi plotësisht gati për takimin e së dielës. Do të japim më të mirën tonë në mënyrë që të marrim fitoren", deklaroi mesfushori, i cili komentoi më pas edhe faktin që do të luhet në fushë asnjanëse. "Deri diku mund të ndikojë kryesisht te pjesa e tifozërisë, pasi dihet që janë mbështetës të fortë të ekipit të Kastriotit. Në Fushë-Krujë na kanë mbështetur maksimalisht, sidomos ndeshjet e fundit. Megjithatë, besoj se edhe në Durrës do kemi një numër të konsiderueshëm tifozësh".