Çudira shqiptare, ekipet shkëmbejnë stadiumet

Klubet janë të dënuara dhe nuk luajnë në fushat e tyre

Futbolli shqiptar ofron gjithmonë çudira dhe situata qesharake. Më e fundit vjen nga kampionati i Kategorisë së Parë ku një pjesë e skuadrave i kanë stadiumet e tyre të dënuara. Konkretisht, tri ekipe nuk mund të luajnë dot në fushat përkatëse, për shkak të dënimeve që kanë marrë nga Komisioni i Disiplinës. Erzeni, Egnatia dhe Tomori i kanë fushat e dënuara. Shijakasit dhe rrogozhinasit kanë gjetur zgjidhjen më të mirë të mundshme duke shkëmbyer stadiumet. Erzeni do të luajë në Rrogozhinë ndeshjen ndaj Vorës, ndërsa Egnatia do të presë Apoloninë në stadiumin "Tofik Jashari" të Shijakut. Në këtë situatë kur të gjitha ndeshjet duhet të luhen në të njëjtën orë dhe datë, duke qenë se pas tyre përcaktohet kalendari i fazës së tretë, dy klubet kanë gjetur zgjidhjen për të shkëmbyer stadiumet.

TOMORI

Skuadra beratase ka qenë më e penalizuara gjatë 10 ditëve të fundit për sa u përket dënimeve të dhëna nga Komisioni i Disiplinës. Përveç dy humbjeve në tavolinë me Apoloninë dhe Bylisin, si edhe heqjen e tri pikëve nga klasifikimi, Tomori është dënuar edhe me katër takime në fushë asnjanëse. Dhe sfidën e sotme ndaj Elbasanit, beratasit kanë vendosur ta zhvillojnë në Ballsh. Tomori ka shfrytëzuar faktin që Bylis luan jashtë këtë javë dhe ka zgjedhur stadiumin "Adush Muçaj" për të pritur verdheblutë. Kujtojmë se në mesjavë, beratasit zhvilluan edhe një miqësore me Bylisin pikërisht në këtë stadium. Edhe Veleçiku kishte përplasje me Vllazninë për sa i përket fushës se ku do ta luajë ndeshjen e sotme ndaj Shënkollit. Dje në mesditë, me ndërhyrjen e FSHF-së, është vendosur që Veleçiku të zhvendoset në Pukë për të luajtur takimin e sotëm.