Kimish: Guardiola më ndryshoi
24-vjeçari Joshua Kimish po luan sezonin e katërt me Bajernin e Mynihut. 156 ndeshje zyrtare me fanellën e kampionëve të Bundesligës ka zhvilluar mbrojtësi gjerman. Në një intervistë për "Franc Football" ai foli për ish-trajnerin e tij, Pep Guardiola dhe atë aktualin, Niko Kovaç. Spanjolli drejtoi skuadrën e Bajernit nga viti 2013 deri në 2016ën. Kimish arriti të luante një sezon me Pep, duke e cilësuar atë si një trajner të rëndësishëm në karrierën e tij. "Me Pep e kam shijuar çdo stërvitje. Ai është një perfeksionist që merret gjithmonë me detajet duke mos ia lënë asnjë gjë rastësisë. Stërvitjet e tij ishin shumë intensive", u shpreh Kimish. "Ai është i dashuruar me futbollin e bukur dhe në aspektin personal më ka mësuar të luaj në shumë pozicione. Nën drejtimin tij kam bërë shumë hapa përpara, kam mësuar shumë për lojën, gjëra që nuk i dija më parë". Për lojtarin më të mirë me të cilin ka luajtur, Kimishit i vjen vetëm një emër në mendje: Ksavi Alonso. "Pasimet e tij ishin kirurgjikale. Ai ishte shumë inspirues, jo vetëm në fushë, por edhe jashtë saj. Ksavi është ndoshta lojtari më i fortë me të cilin kam luajtur. Ai e dinte gjithmonë se çfarë do të bënte me topin para se ta merrte atë. Ishte truri i skuadrës". Me Niko Kovaçin, Kimish e ka pasur jo të lehtë të tregojë aftësitë e tij, edhe pse është lojtari që ka dhënë më shumë asiste në Bundesligë. "Kemi vuajtur shumë në fazën e parë, ndryshimi i trajnerit është i vështirë për të gjithë. Duhet kohë për t'u përshtatur me sistemin e ri. Të presim edhe pak", përfundoi mbrojtësi. Në Mynih janë të shumtë ata që e krahasojnë me ish-kapitenin Filip Lahm, por Joshua ka ende shumë vite për të luajtur dhe që tani është shndërruar në një nga lojtarët më të mirë në Gjermani.