Ja pse Suarez është titullar te katalanasit
Luis Suarez është bërë çështje me të drejtë. Ka shënuar vetëm një gol në 8 ndeshjet e fundit, një shifër e ulët për golashënuesin e pestë më të mirë të historisë së Barcelonës. Sigurisht që duhet të përmirësohet më shumë në këto momente përpara portës kundërshtare, por ka të tjera statistika që i japin besim. Uruguaiani është asistuesi i tretë më i mirë i Barcelonës në këtë sezon. Ka arritur të japë 8 pasime pozitive për gol, 3 më shumë sesa Kutinjo dhe Dembele. Nuk është detyra e tij kryesore, por diçka e tillë e bën sulmuesin një pikë të fortë për skuadrën katalanase. Numri nëntë i Barcelonës ka dhënë 6 asiste më shumë sesa Artur Melo. Vetëm Rakitiç me 6 të tillë i afrohet nga mesfushorët e skuadrës. Vidal ka dhënë 4 dhe Alenja 1. Dy futbollistë në skuadrën katalanase kanë shërbyer më shumë pasime pozitive për shokët e skuadrës, bëhet fjalë për Albën me 14 dhe Mesin me 17. Por ka akoma më shumë. Prej kohësh, Suarez nuk është thjesht një golashënues apo një asistues. Ai e ndihmon shumë Leo Mesin duke i krijuar hapësira që ky i fundit të depërtojë. Historikisht, uruguaiani është një lojtar i vlerësuar maksimalisht nga trajnerët. Mosha e tij është shndërruar në një handikap të rëndësishëm, por që ta lësh në stol në këto momente nuk është plan i mirë, sepse te Barcelona nuk ka një lojtar që mund ta bëjë punën e tij, por është e vështirë që edhe në Europë të gjesh një të ngjashëm. Në momentin më delikat të sezonit, Barcelona ka nevojë për të. Ndoshta është sot shansi i tij.