Vllaznia s'njeh rivalë, fiton Kupën
Vajzat kuqeblu triumfuan dje në "Elbasan Arena" me rezultatin 3-0 ndaj Apolonisë
Vllaznia rikonfirmo het skuadra më e mirë e futbollit shqiptar të femrave, duke mbajtur sërish në Shkodër trofeun e Kupës së Shqipërisë. Vajzat shkodrane mundën pa shumë probleme ato të Apolonisë në shifrat e pastra 3-0, duke mos surprizuar askënd, sepse hynin në këtë finale si favorite. Fillimisht ishte Bajraktari ajo që zhbllokoi shifrat në pjesën e parë, ndërsa në të dytën Doçi me penallti dhe Mustafaj, hipotekuan fitoren. Kjo fitore, ashtu siç u pa edhe në pankartat gjatë marrjes së trofeut, iu kushtua qytetit të Shkodrës, i cili, këtë vit feston 100-vjetorin e klubit të futbollit. Një organizim i mirë i kësaj finaleje, me trofeun që u dorëzua nga Edvin Libohova dhe një pjesëmarrje e kënaqshme e zyrës rajonale të FSHF-së Elbasan që u kujdes për mbarëvajtjen e finales.
NDESHJA
Shkodranet e nisin më mirë ndeshjen, të cilat kanë një qarkullim më të dendur të topit dhe mundohen të mos lënë shumë hapësira për kundërshtaret. Fillimisht krosimi i Doçit, goditet me kokë nga Gruda, por topi pritet nga portierja fierake. Në të 17-ën Apolonia ka mundësinë më të mirë për të shënuar me Zargon që godet fort, por grushton me vështirësi portierja shkodrane. Topi mbetet në lojë, por në fund ia dalin shkodranet të largojnë rrezikun. Një minutë më pas Doçi kroson në zonë, godet Bajraktari me kokë dhe sfera ndalet në rrjetë. Ndeshja bëhet interesante me fieraket që mundohen të mbajnë larg nga zona kundërshtaret, kryesisht me Iliadhin, por hasin vështirësi për të dalë përpara, duke mos pasur mundësi të tjera të pastra për të barazuar shifrat. Fraksioni i parë i lojës mbyllet me shifrat 1-0 për Vllazninë. Edhe në pjesën e dytë të lojës vijon dominimi i kuqebluve, të cilat përveçse administrojnë avantazhin, rrezikojnë shumë me anë të goditjeve të ndaluara. Rezultati do të dyfishohej në të 53-ën pas një penalltie të shndërruar në gol nga Doçi, duke hipotekuar praktikisht edhe fitoren. Doçi është një rrezik konstant për portën fierake, por goditja e saj përfundon pak mbi tra. Gjithsesi, në të 65-ën do të vijë edhe goli i tretë i Vllaznisë, me Mustafajn, që në zonë driblon bukur dhe diagonal e dërgon topin mbi portieren duke e ndalur në rrjetë. Praktikisht gjithçka është e mbyllur me fieraket që janë të pafuqishme për të ndryshuar diçka. Në të 80- ën Megi Doçi provon me një silurë nga jashtë zone dhe topi ndalet në traversë. Kështu, mbyllet gjithçka në shifrat e pastra 3-0, me Vllazninë që konfirmohet për të gjashtën herë radhazi fituese e Kupës së Shqipërisë.