Havier Zaneti flet si kapiten: Ikardi të sqarohet me skuadrën
“Ajntrahti i vështirë, por Interi kërkon çdo trofe”
Për herë të parë që kur Interi i hoqi shiritin Mauro Ikardit, “në fushë” ka zbritur “kapiteni i vërtetë” i tifozërisë interiste: Havier Zaneti. Prezent mesditën e djeshme në Nion, ku goglat e shortit të Ligës së Europës vendosën përballë zikaltrit dhe Ajntrahtin e Frankfurtit për fazën e 1/8ave të turneut, argjentinasi ka prekur edhe çështjen që i përket bashkëkombësit të tij. Duke u përpjekur të qartësojë situatën: “Mendoj se Ikardi duhet të rikthehet i rëndësishëm për ne, shpresoj të jetë gati për 1/8-at, sepse mund të ndihmojë skuadrën”, ka shpjeguar 45-vjeçari. “Kur në grup ekzistojnë probleme, duhen zgjidhur në brendësi: këtë çështje madje e shoh si një mundësi për të forcuar kolektivin. I zhgënjyer prej tij? Më vjen keq për situatën e krijuar, Mauro është pjesë e ekipit dhe duhet të sqarohen mes tyre; gjithmonë duke menduar në të mirë të skuadrës, sepse askush nuk është më i rëndësishëm se skuadra”.
NË MBËSHTETJE TË HANDANOVIÇIT - Lidhur me shanset që numri 9 të rikthehet përsëri kapiten, Zaneti shtoi: “Fillimisht mendoj se duhet zgjidhur konflikti, por vendimi i marrë nga klubi ishte i studiuar. A i kam folur? Ende jo. Le të lëmë kohën të kalojë, së pari lojtarët duhet të flasin mes tyre; unë nuk kam probleme t’i flas duke menduar të mirën e Interit”. Pas fitores
4-0 të së enjtes kundër Rapidit të Vjenës, Samir Handanoviç, “veterani” që u emërua kapiten pas degradimit të Ikardit, komentoi se “shiriti nuk është një titull fisnik apo trofe, por megjithatë një përgjegjësi e madhe. Madje, personalisht në një
klub si Interi e konsideroj privilegj. Pak rëndësi ka kush e mban shiritin: thelbësore është që në skuadër të luajnë ata 5-6 lojtarë që marrin përgjegjësi dhe luftojnë për grupin. Me apo pa shirit, sillem si gjithmonë”. Fjalë të cilave u është bashkuar zv.presidenti Zaneti:
“Po, shiriti është një simbol. Unë gjithmonë kam ndjekur sjelljen e Xhuzepe Bergomit që e mbajti të veshur përpara meje: shiriti do të thotë të jesh një shembull për shokët e skuadrës brenda dhe jashtë fushës. Tani duhet të përqendrohemi te rezultatet”.
RIVALI AJNTRAHT – Në batutat finale, Zaneti ka analizuar Ajntrahtin, kundërshtarin e radhës të Interit në Europë: “Fakti që luajmë kthimin në ‘San Siro’ përpara derbit mund të jetë një faktor pozitiv për ne. Do përballemi me një skuadër gjermane, e vështirë
për t’u mposhtur. Nevojitet një përgatitje maksimale për të kaluar turin. Ne favoritët? Mendoj se Interi duhet të përpiqet gjithmonë të shkojë në fund të kompeticioneve. Skuadra ka marzh rritjeje: vetëm kështu mund të kalojnë në fazën tjetër”, përfundoi Zaneti.