Onuh shou, dopietë dhe të kuq për 8 minuta
Turbina "flakë" në Kavajë, por nuk e shmang dot humbjen
Darlington Onuh i bën të gjitha, shënon dy gola dhe merr dy të verdhë për 8 minuta lojë. Dhe gjithçka ka ndodhur në fundin e ndeshjes. Sulmuesi nigerian i Besës i ka dhënë tri pikë të çmuara ekipit të tij, por nga ana tjetër iu desh që të linte fushën pas të kuqit që mori në të 88-ën. Kavajasit e kanë mbyllur me fitore fazën e dytë, por duhet thënë që kanë vuajtur shumë përballë Turbinës. Cërrikasit kanë bërë rezistencë dhe kjo duket qartë nga 11 të verdhët dhe 1 i kuq.
Ndeshja - Miqtë kishin ardhur me ambicie për të marrë diçka në Kavajë. Besa, edhe pse me mungesën e Çelhakës dhe Bibës, nga ana e saj ka hyrë në fushë vetëm për maksimumin. Dikson, Çekiçi e Ejoh tentojnë disa herë kuadratin mik, por portieri Hasanbelli grushton. Kjo mënyrë loje e vendësve u jep mundësi të arta miqve për kundërsulm. Në të 23-ën, Bakiu në hyrje të zonës godet, por pret Miraka. Ndërsa verdhezinjtë janë të gjithë në sulm, miqtë përsëri rrezikojnë, këtë herë me Bërdufin, që del i vetëm përballë Mirakës, por ky i fundit eviton një gol të sigurt. Me këtë dominim të Besës, por dhe me një kundërsulm të rrezikshëm të miqve, mbyllet pjesa e parë. Verdhezinjtë kthehen në fushë më të qartë dhe nisin të "bombardojnë" portën mike. Turbina detyrohet të mbrohet fort përballë krosimeve të njëpasnjëshme të verdhezinjve drejt zonës, sa në ballore aq edhe në krahë, por portieri mik në 3 raste eviton gola të sigurt. Magani kryen dy zëvendësime për të finalizuar shumë raste. Mihani e Onuh, por edhe Thaçi ndryshojnë efikasitetin e lojës. Kapiteni Mihani "thërret" armën e tij më të mirë, goditjet e dënimit në minutën 80. Ai lëshon një predhë të vërtetë, ku Hasanbelli vetëm sa e grushton dhe Onuh tashmë afër shënon. Ky gol thyen besimin e miqve për surprizën dhe Onuh shënon përsëri brenda zonës, pas vetëm 3 minutash. Për çudi, pas këtij goli ndodh një përplasje pa shkak mes lojtarëve, që shtyjnë me duar njëri-tjetrin dhe gjyqtari Emirjon Sino nuk fal askënd dhe ndëshkon plot 4 futbollistë, ku Onuh me të verdhën e dytë merr të kuqen dhe rrjedhimisht del nga fusha e lojës. Fundi i lojës nuk sjell më asgjë dhe për kavajasit nis festa.