Pogradeci, fitore për... mbijetesën
Topllari vendos ndeshjen, Lushnja luan me të rinjtë dhe humbet në "Gjorgji Kyçyku"
Pogradeci merr një fitore ngushëlluese përballë Lushnjës në fundin e fazës së dytë. Liqenorët kanë mposhtur minimalisht verdhejeshilët në "Gjorgji Kyçyku", falë golit të Topllarit. Në fakt, ky trepikësh nuk ndryshoi asgjë në renditje, pasi të besuarit e Festim Fetollarit mbetën jashtë zonës së "Play-Off"-it. Nga ana tjetër, miqtë kishin ardhur të qetë në këtë transfertë, pasi kishin siguruar pesëshen e parë të Grupit B, ndaj edhe Ilir Gjyla pati shansin që t'u jepte minuta të rinjve që kishte në dispozicion, të cilët vazhdojnë të dëshmojnë se do t'u duhet kohë që të fitojnë kredite përballë përvojës së titullarëve. Kjo ndeshje është luajtur në temperatura të ulëta, ndërkohë që era shpeshherë ka penguar edhe lojën. Vendësit kanë vuajtur mungesën e tre futbollistëve titullarë.
PJESA E PARË - Takimi ka qenë i dominuar nga Pogradeci, nga minutat e para deri në çastin që është shënuar goli. Vija sulmuese del shumë herë para portierit Spaho, duke filluar nga Alillari, Topllari dhe Shkullaku. Ky i fundit del i vetëm përballë portierit mik në të 17ën, por nuk gjen kuadratin. Më pas tenton Kasa, që nga shumë afër ia dhuron topin në duar Spahos. Në minutën e 31-të, Topllari pengohet në zonë dhe Jahaj nga pika e bardhë nuk arrin dot të shënojë. Për këtë, meritë ka Spaho që grushton penalltinë. Pas këtij momenti, pogradecarët shfaqen edhe më kërkues, por portieri i Lushnjës është i pakalueshëm.
PJESA E DYTË - Pjesa e dytë do të jetë e rasteve të shumta për liqenorët. Është Topllari që gjuan në minutën e 51-të, por Spaho pret në pozicion. Kjo skenë përsëritet edhe në minutën e 59-të, por këtë herë gjuan Alillari. Shkullaku shpërdoron në minutën e 77-të, kur me portën e boshatisur gjuan, por jashtë. E megjithatë, 8 minuta para fundit vjen edhe zhbllokimi i shifrave. Shkullaku vepron mirë nga e majta e sulmit, dërgon një top për Topllarin, që këtë herë është i saktë me një gjuajtje tokazi dhe mposht Spahon. Më pas është ekipi lushnjar më kërkues. Madje, verdhejeshilët i afrohen shumë barazimit, por Mali i vendësve është i gatshëm, duke i mohuar golin. Me këtë fitore, pogradecarët vazhdojnë të jenë zhgënjyer, pasi tashmë do t'u duhet që të luajnë vetëm për mbijetesën.