Tuhel: “Djajtë” të pabesë, jemi gati për çdo skenar

"Mançesteri është gati për gjithçka, për Kavanin vendos sot"

PSG ka humbur vetëm një herë në 16 ndeshjet e fundit në shtëpi në Champions (10 fitore, 5 barazime). Por kjo humbje erdhi pikërisht në 1/8-at e sezonit të shkuar, kundër Realit (1-2). Tomas Tuhel është i qetë pas fitores 2-0 në Mançester dhe konferencën për shtyp në "Parc des Princes", e nis duke informuar mediat për Kavanin, nëse do të jetë apo jo i gatshëm sot. "Do të marrim një vendim të mërkurën", tha tekniku gjerman, i cili është i përgatitur për çdo skenar të mundshëm: "Duhet ta harrojmë rezultatin e ndeshjes së parë. Parimet tona të lojës duhet të mbeten të pandryshueshme dhe të bëjmë një ndeshje të nivelit të lartë. Duhet të përpiqemi gjithnjë të përmirësohemi. Mançester Junajtidit i pëlqen të luajë 4-4-2 jashtë shtëpisë. Ne duhet të gjejmë një zgjidhje. Duhet të vendosim ritmin dhe të kontrollojmë takimin në gjysmëfushën e tyre dhe të bllokojmë kundërsulmet e nisura lart në fushë shumë shpejt. Dy sulmuesit e tyre janë shumë të shpejtë, shumë të fortë". Ish-trajneri i Dortmundit largon presionin nga skuadra e tij sa i përket rolit të favoritëve që u është dhënë këtë sezon: "Është e pamundur që ta vendosësh PSG-në mes favoritëve të Ligës së Kampionëve. Nuk na e lejon historia. Është si në tenis, nuk mund të thuash që do të fitosh 'Roland Garros', nëse nuk ke shkuar në finale apo gjysmëfinale". Pastaj fjalët e kortezisë për rivalin e tij, Ole Gunar Solskjaer: "E ka treguar disa herë se ka qenë shumë i rëndësishëm për skuadrën. Në gjysmë ore, 10 minuta, kurdo që hynte, ai e tregonte atë shpirtin që personifikon Junajtid. Këta djem janë gati për gjithçka. Ata kanë një bilanc shumë të fortë me norvegjezin". Në mungesë të Nejmarit dhe ndoshta edhe të Kavanit, sërish përgjegjësinë e sulmit do ta ketë Kilië Mbape, autor i golit të dytë në "Old Trafford": "Mbape është një nga sulmuesit më të mirë në botë. Ai mund të bëhet më i miri".