De Jong e Tadiç: Në Madrid bëmë ndeshjen e jetës

Heroi i Ajaksit: Frymëzohesha nga Zinedin Zidan

Në Amsterdam po rritet një brez i artë. Premton shumë për të ardhmen e largët, por ndoshta edhe për atë të afërt. Në Madrid shkruan historinë duke eliminuar ekipin kampion për 3 vite radhazi dhe kjo ndeshje mbante firmat e disa lojtarëve kryesorë. Frenki De Jong dhe Dushan Tadiç ishin dy nga më të mirët në fushën e lojës. Njëri me saktësinë në pasime dhe tjetri me golat dhe asistet. Mesfushori holandez thumboi Realin, teksa thotë se i kërkuan nga Barcelona që të nxirrnin nga gara madrilenët, ndërsa serbi u tregon të gjithëve se idhulli i tij ka qenë Zinedin Zidan.

DE JONG- Në verë do të transferohet te Barcelona, por Frenki De Jong po i shijon muajt e fundit tek Ajaksi. Ai thumbon madrilenët për eliminimin, skuadër që do të jetë rivale e tij e përjetshme. “Është fantastike të fitosh këtu dhe me rezultatin 4-1. Ishte një ndeshje e madhe dhe luajtëm mjaft mirë. Për të qenë i sinqertë, mendoj se nuk luajtëm keq edhe në sfidën e parë. Thjesht kishim fatin e keq me rezultatin. Këtë herë gjithçka funksionoi siç duhet dhe jemi të lumtur për kualifikimin në çerekfinale. Barcelona? Përpara ndeshjes më kishim kërkuar që ta eliminonim Realin, por tani nuk e di nëse më kanë uruar. Nuk e kam parë ende telefonin”, tha De Jong.

TADIÇ- Dushan Tadiç e konsideron ndeshjen e djeshme si më të mirën e karrierës së tij. Ai tregon se idhulli i tij ka qenë Zidan. “Me shumë mundësi, kjo ishte ndeshja më e mirë e karrierës sime. Ne mundëm ekipin më të fortë në botë dhe jam shumë krenar që bëra të lumtur tifozët tanë. Në futboll duhet që të relaksohesh, të argëtohesh dhe të shijosh lojën. Ne jemi një skuadër shumë e mirë dhe bëjmë futboll të këndshëm. Zidan? Ai është idhulli im dhe lojtari që më ka pëlqyer gjithmonë. Kam parë shumë klipe të tijat dhe frymëzohem nga performancat e tij”, përfundoi serbi.