Gnabri rinovon deri në 2023, Mateus beson te tripleta e Bajernit

Sulmuesi i krahut të djathtë, Serge Gnabri, do të jetë një lojtar i Bajernit deri më 30 qershor 2023. 23-vjeçari ka bindur drejtuesit e skuadrës më të titulluar në Gjermani, pas një gjysmë sezoni shumë pozitiv. Gnabri ka qenë deciziv me golat e tij në disa prej ndeshjeve të fazës së dytë. Më e spikatura ka qenë ajo për Kupën e Gjermanisë ndaj Hertës së Berlinit. "Jemi të kënaqur që arritëm të mbajmë lojtarin për një kohë të gjatë. Ai ka bërë një hap përpara në karrierën e tij", ishin fjalët e drejtorit sportiv të bavarezëve, Hasan Salihamixhiç. MATEUS BESON TE TRIPLETA Ish-kapiteni Bajernit, Lotar Mateus, beson se skuadra bavareze ka stofin për të fituar të gjitha trofetë në këtë sezon. "Kovaç, drejtuesit dhe lojtarët kanë arritur të kalojnë krizën e fillimsezonit në mënyrën më të mirë të mundshme", u shpreh Mateus. "Në Champions ata zhvilluan një ndeshje të parë pozitive në "Anfield", duke mbajtur të hapur kualifikimin. Në Kupë ata presin Haidenhaimin, një kundërshtar që nuk ka shumë nevojë për koment. Ndërsa në luftën për titull, bavarezët kanë arritur të barazohen me pikë me skuadrën e Borusias së Dortmundit që tani ka filluar të dridhet. Ata e kanë stofin e një skuadre që mund të fitojnë trip- letën, dhe nëse luajnë të bashkuar kjo mund të arrihet", ishin fjalët e ish-kapitenit. Forma e mirë e kampionëve të Gjermanisë në pjesën e dytë të sezonit ka sjellë optimizëm jo vetëm te skuadra, por edhe te tifozët e shumtë gjermanë, të cilët dëshirojnë të sjellin trofeun e Champions-it në Mynih.