Tavo: Dua kupën, Aleksi na ka dëmtuar

Për dyshen teknike të bluzinjve Ahmataj-Novi s'ka kohë për të humbur. Çdo ditë më shumë në shërbim të ndeshjes së radhës, që do të thotë më shumë përgjegjshmëri për t'u përballuar si të barabartë ndaj çdo kundërshtari. Ndërprerja e garës e kushtëzuar me "orakullin" e pafundmë të përjashtmit të Kamzës nga gara, për bluzinjtë ka mjaftuar për më shumë përkushtim dhe seriozitet në vijimësi. Të ndërgjegjshëm për kalendarin e ngjeshur të muajit mars, pse jo dhe për objektivin e fundit, bluzinjtë e Ahmatajt mbeten më shumë se të vendosur për të synuar kualifikimin në turit të radhës të Kupës, që ka emrin Partizan. Lidhur me kalimin e turit të 1/8-ave të Kupës së Shqipërisë si dhe çështjen "Aleksi", "Panorama Sport" kontaktoi me presidentin Grigor Tavo, i cili u shpreh: "Nuk heqim dorë nga Kupa dhe jemi të përqendruar për të marrë gjithçka nga ky kompeticion. Sa i përket pyetjes suaj që ka të bëjë me të ardhmen e Aleksit, ju them sinqerisht se Albano është futbollist i Luftëtarit deri në fund të sezonit. Dy muajt e fundit të kontratës janë periudhë bisedimesh për rinovimin e kontratës, sanksionuar kjo në pikën 16 të kontratës mes palëve. Aleksi, me ose pa dashje na ka penalizuar në pjesën më të rëndësishme të sezonit, duke u dënuar me pesë ndeshje. Për këtë arsye, klubi ka marrë masat e tij ndaj lojtarit", tha, presidenti i Luftëtarit, Grigor Tavo.

STËRVITJA - Teksa do të duhen ditë për të mësuar vijimësinë e garës, bluzinjtë e Ahmatajt edhe sot do të vijojnë përgatitjet, me qëllim të vetëm mbajtjen në tonus të ritmeve të përgatitjes fizike. Për Luftëtarin, sfida e radhës me Skënderbeun, duke marrë në konsideratë rezultatin 3-0 ndaj Kamzës, do të thotë më shumë siguri dhe hedhje hapi të sigurt për misionin mbijetesë.