Burg kush shkel fushën, Rama: Rama: FSHF FSHF si si ambulancë ambulancë
Batuta, polemika për kafshët dhe himni i Milanit, ja pikantet
"Çdo e keqe e ka një të mirë". Një shprehje që i shkon përshtat edhe asaj që po ndodh në futbollin shqiptar. Dhuna në ndeshjen Kamza-Laçi 1-1, e luajtur më 3 mars provokoi një reagim të paparë, me FSHF-në që mori masa drastike ndaj klubit të Kamzës, ndërsa arbitrat bojkotuan kampionatin. Kjo bëri që dje të zhvillohej një takim i zgjeruar, ku drejtuesit e FSHF-së dhe klubet shqiptare "qanë" hallet para kryeministrit Edi Rama dhe ministrave të kabinetit të tij. Problematika nga më të ndryshmet u trajtuan dhe morën bekimin e kreut të qeverisë, ndërsa gjithçka do të nisë me ndërhyrjen në Kodin Penal për të frenuar dhunën. Për këtë ishte vetë kryeministri që mori si model Anglinë. "Kushdo që do të shkelë fushën, do të dënohet me tri vite burgim dhe përjashtim përjetë nga stadiumet". Rama ishte i qartë.
DHUNA DHE MASAT
"Jemi mbledhur këtu si rezultat i nevojës për një reagim të përbashkët ndaj një fenomeni që nuk mund të tolerohet më. Unë besoj se modeli anglez është i duhuri kundër dhunës dhe huliganizmit. Pjesëmarrja në stadium e çdo sportdashësi si spektator duhet të konsiderohet me një status të veçantë, për t'i dhënë spektatorit më shumë detyrime për përgjegjësinë që ka brenda një mjedisi ku çdo veprim individual mund të konsiderohet edhe nxitje për të tjerët. Për mirë ose për keq dhe kjo nuk është një shpikje, por është një gjë që vendet e tjera e kanë. Unë dua të them sot se ne do të ndërhyjmë menjëherë në Kodin Penal dhe kapërcimi i vijave të bardha dhe futja në tapetin e gjelbër do të dënohet me 3 vjet burg. Jo gjobë deri në tre vjet, por 3 vjet burg. Kush kalon vijën e bardhë dhe hyn në tapetin e gjelbër është një kërcënim fizik për ata që aty janë duke ushtruar detyrën e tyre, qofshin futbollistë apo arbitri. Në këto kushte, kemi domosdoshmërinë ta diskutojmë me shpejtësi dhe ta aplikojmë menjëherë këtë dënim, minimumi 3 vjet. Nga njohuria ime e kufizuar, ndëshkime shumë më të rënda sesa tre vjet burg u praktikuan në vitin 1989 në Angli, me iniciativë të kryeministres së kohës, për t'i dhënë përgjigje përfundimtare dhunës si sport më vete që karakterizonte futbollin anglez. Jo vetëm që u zhduk dhu-
na nga stadiumet, por u zhdukën edhe telat, edhe barrierat dhe u kthyen stadiumet njësoj si opera, njësoj si teatër, ku nuk i shkon ndërmend një fryme të gjallë që të kapërcejë vijën e bardhë, sepse shkon drejtpërdrejt në burg e jo në shtëpi, edhe sot që flasim. Burgimi dhe përjashtimi përjetë nga stadiumi i atyre që prekin vijat e bardha do të jetë hapi i parë që ne do të bëjmë me Parlamentin, duke ndryshuar Kodin Penal", deklaroi Rama.
POLICIA DHE KUSHTI
"Është koha që Policia e Shtetit dhe federata të mos ia
lënë topin njëra-tjetrës, por të bashkëpunojnë seriozisht. E di që ka një pengesë aktuale ligjore lidhur me organizimin e shërbimeve policore në mjediset e brendshme të stadiumeve, pasi këtë ligji nuk e lejon dhe që rikthimi i policisë në stadiume do të kërkonte amendimin e këtij ligji, ashtu sikundër edhe një vendim të posaçëm të qeverisë. Por kjo nuk është një arsye për t'u fshehur pas gishtit apo për të parë gishtin kur gishti tregon hënën, por është një nga aspektet që ne duhet të trajtojmë bashkërisht, pasi unë besoj se, aq sa është e rëndësishme që
policia të përfshihet në këto kushte, aq është e rëndësishme që të mos mbetemi thjesht te policia. Një nga problemet e konfliktit mes policisë dhe FSHF-së lidhet me cilësinë e impianteve sportive. Duke qenë se ka mjaft impiante që është objektivisht e vështirë që të hyjnë në parametrat normalë të lejueshëm të sigurisë, atëherë policia nga njëra anë e hedh topin te federata, nga ana tjetër federata nuk ka se si të mos e kthejë topin te policia, ndërkohë që duhet bashkërisht të garantojmë monitorimin me kamera të të gjitha impianteve. Jetojmë në epokën e teknologjisë, e cila na jep mundësinë që pa kosto të larta, por siç kemi treguar me federatën se kostot dimë t'i përballojmë bashkërisht, kur bëjmë projekte të përbashkëta. Të organizohemi menjëherë dhe klubet të detyrohen që të pajisin impiantet me kamera, duke i dhënë mundësinë policisë të identifikojë të gjithë keqbërësit në stadium dhe duke i bërë të pakthyeshme kërkesat e prokurorisë në adresë të gjykatave, me prova", është shprehur më tej kryeministri i Shqipërisë.
FSHF SI AMBULANCË
Në fund Rama u ndal te problematika që ka menaxhimi i stadiumeve në vendin tonë. "Deri më sot nuk kemi faktikisht asnjë stadium të menaxhuar normalisht dhe është bërë FSHF si ambulancë që merr përsipër menaxhimin, ndërkohë që normaliteti do të kërkonte që pronarët e stadiumeve, bashkitë në këtë rast, në bashkëpunim me klubet, të hynin në një logjikë të re. Hyrja në një logjikë të re do të thotë që ne të diskutojmë seriozisht për një fond për infrastrukturën sportive, një fond siç është shembulli anglez. Ka edhe shembuj të tjerë, ku shteti ka qenë bashkëfinancues në investime impiantesh sportive, ka hyrë në partneritet me klubet apo shoqëritë që kanë pasur pronësi në këto stadiume dhe ka ruajtur një përqindje pronësie. Rrimë akoma në situata absurde me bashki që refuzojnë bashkëpunimet me investitorët, me një legjislacion që është i hapur për çdo lloj spekulimi dhe për çdo lloj abuzimi dhe praktikisht çfarë korrim? Korrim dhunë në stadiume që s'kanë asnjë standard, edhe t'i quash stadium e madje ofendon të gjithë stadiumet që meritojnë të quhen të tilla", përfundoi Rama.