Çerekfinalet e Kupës, Partizani sytë nga... Hebaj

Të kuqtë pritet të sulmojnë me forca të shumta për të hedhur hapin e parë të kualifikimit

Kupa e Shqipërisë është po aq e rëndësishme sa kampionati për Partizanin. Këtë gjë e tregon edhe vlerësimi që të kuqtë i kanë bërë ndeshjes së parë çerekfinale me Luftëtarin, takim i cili do të luhet sot në "Elbasan Arena". Ishte menduar se për këtë takim stafi mund të bënte një rrotacion në formacion, por mbyllja e...

Kupa e Shqipërisë është po aq e rëndësishme sa kampionati për Partizanin. Këtë gjë e tregon edhe vlerësimi që të kuqtë i kanë bërë ndeshjes së parë çerekfinale me Luftëtarin, takim i cili do të luhet sot në "Elbasan Arena". Ishte menduar se për këtë takim stafi mund të bënte një rrotacion në formacion, por mbyllja e përgatitjeve ka treguar tjetër gjë. Në seancën e fundit që u zhvillua dje në orën 17:00, trajneri Gega ka provuar për pak minuta edhe një formacion të mundshëm. Ndonëse grupi konsiderohet i plotë, te "demat" nuk ka vend për eksperimente, kështu që për Luftëtarin pritet të luajnë lojtarët e formacionit bazë dhe me forca të shumta në sulm. Ndryshimi vetëm për këtë takim të sotëm mund të jetë Rubin Hebaj në majë të sulmit. Kontribut të rëndësishëm për Partizanin në dy turet e para të Kupës kanë dhënë futbollistët shkodranë, Rubin Hebaj dhe Erald Çinari, ku secili ka shënuar nga 4 gola. Gjasat janë që sot trajneri Gega t'i besojë goleadorit të Kupës, Hebajt, i cili si pikë referuese në majë të sulmit do të ketë shërbimet e Malës dhe Asanit nga krahët, ndërsa Bardhi do të veprojë pas shpinës së tij. Ndërprerja e kampionatit i erdhi në ndihmë Ardit Hilës që të rikuperohet më mirë, por me shumë mundësi trajneri nuk do të rrezikojë me aktivizimin e elbasanasit, kështu që nuk pritet titullar. Pa Hilën i bie që Atanda të formojë dyshen e qendrës së mesfushës me Telushin. Me atë që u pa në seancën e fundit, stafi i mëshoi shumë vertikalizimeve nga krahët, ku Hebaj dhe Bardhi mund të kenë më shumë mundësi në zonën e kundërshtarit në ndeshjen e sotme.