Himni i Milanit prish qetësinë, polemika për kafshët

Lumë kryebashkiakësh, Sinan Idrizi "mbyll gojën"

Një kryeministër në tryezën e futbollit. Aktorët e këtij sporti në Shqipëri nuk janë mësuar me takime të tilla kaq të rëndësishme ku merr pjesë kryeministri i Shqipërisë, Edi Rama, Ministri i Brendshëm, kryetarë komisionesh parlamentare dhe zv.ministra. Thuajse të gjithë presidentët e klubeve të Superiores, një numër i konsiderueshëm kryetarësh të bashkive dhe përfaqësues të shumtë të të gjitha klubeve të futbollit shqiptar ishin dje të pranishëm në tryezën e organizuar nga FSHF dhe kryeministri me temë: "Për futbollin. Siguri, reformim, modernizim". Gazeta sjell momentet më të veçanta gjatë takimit të djeshëm ku nuk munguan batutat e shumta mes kryeministri Rama dhe aktorëve të futbollit shqiptar.

TË VEÇANTA

-Shumica e të pranishmëve në këtë takim ishin kryetarë të bashkive që drejtohen nga të zgjedhur të Partisë Socialiste, që më së shumti kanë në administrim klube të Kategorisë së Parë dhe të Dytë. Nga krahu tjetër politik e pranishme ishte vetëm kryetarja e Bashkisë Shkodër, Voltana Ademi, e cila është "de jure" edhe presidente e Vllaznisë. Femrat përfaqësoheshin edhe nga kryebashkiakja e Sarandës, Floriana Koka që administron Butrintin në Kategorinë e Dytë.

-Në një moment, anëtari i Komitetit Ekzekutiv të FSHF-së, Vasil Bici, reagon ashpër sapo dëgjon kryetarin e komisionit të ligjeve, Ulsi Manja, që paralajmëron se propozimi i kryeministrit për ndryshimet në Kodin Penal në lidhje me dhunën në futboll, do të shqyrtohet krahas atyre për mbrojtjen e kafshëve dhe sigurimit ushqimor. "Ta mbani për vete atë ofezë që bëtë për futbollin", ishte reagimi i Bicit, i cili bashkë me anëtarët e tjerë të KE-së nuk ishin të ulur në tryezën e rrumbullakët, por pas saj. Në këtë moment ndërhyn kryeministri Rama, i cili e sqaron menjëherë: "U keqkuptuat me atë që tha Ulsi. Duke qenë se Kodi Penal ndryshon rrallë dhe për momentin po shqyrtohen ndryshime në ligjin për mbrojtjen e kafshëve dhe sigurisë ushqimore, të ndërhyhet edhe për të bërë këto ndryshime që të dënohen me tri vite burg ata që kalojnë vijat e bardha të fushës.

-Kryetari i Komisionit të Ligjeve, Ulsi Manja dhe ai i Komisionit të Ekonomisë, Arben Ahmetaj, u larguan nga salla të parët sapo nisën propozimet e drejtuesve të klubeve, kjo për shkak të angazhimeve të tyre.

-Në dy raste, zilja e celularit të ish-shefit të sektorit të garave në FSHF, Besnik Çela, shkaktoi ilaritet në sallë, duke tërhequr vëmendjen e të pranishmëve, kjo edhe për faktin se bëhej fjalë për himnin e Milanit. Çela është një tifoz i hershëm i kuqezinjve italianë.

-Teksa po fliste zv.ministri i Sporteve, Kostandin Shkurti, fonia prishet dhe për pak sekonda rregullohet. Batuta e Ramës është epike në këtë moment. "U fik mikrofoni se u lodh...", tha kryeministri.

-Sapo Armand Duka mbërrin në vendin ku do të zhvillohej takimi, nuk mungon batuta me presidentin e Adës, Alfred Pjetri: "Jemi mbledhur për të rrëzuar qeverinë. Upss, harrova. Ne jemi me këta .... (qesh)".

-Gjatë diskutimeve ra në sy fakti se drejtori i Partizanit, Olsi Rama, nuk bëri asnjë koment. Natyrisht përballë kishte vëllanë e tij kryeministër dhe kjo ndoshta bëri që të stepej, duke u lënë radhë të tjerëve.

-Administratori i Flamurtarit, Sinan Idrizi, ishte nga ata që nuk folën në takimin e djeshëm. Të shumtë ishin ata që u habitën, pasi Idrizi është një personazh shumë mediatik dhe për më tepër gjatë fjalimit u përmend edhe nga Safet Gjici. Pas përfundimit të diskutimeve, një prej gazetarëve ngacmoi Idrizin. "Hëmo Sinan, të kishin hequr mikrofonin sot, pse nuk fole?" Idrizi iu përgjigj kështu: "Unë flas gjithnjë, ta sqaroj jashtë pse nuk fola".

-Ndërsa gjatë takimit të djeshëm flitej për dhunën, presidenti i Bylisit, Besnik Kapllanaj ishte vetëm pak metra larg zyrtarit të federatës, Besnik Çela, të cilin e ka dhunuar disa vite më parë. Për shkak të dhunës në atë kohë, Bylis u zbrit nga Superiorja në Kategorinë e Parë, siç ndodhi me Kamzën.

-Në takimin e djeshëm ra në sy mungesa e përfaqësuesve të klubit të Kamzës. Asnjë prej drejtuesve apo zyrtarëve të skuadrës kamzali që u dënua me zbritjen në Kategorinë e Dytë pas dhunës ndaj arbitrit Eldorjan Hamiti, nuk ishte në tryezën e organizuar dje.