Ahmataj: Për kualifikim me “demat”, kampionati prioritet për Luftëtarin
Gjirokastritët vlerësojnë Partizanin, por do të ketë rrotacion
Të favorizuar nga ndërprerja e kampionatit për arsye të bojkotit të arbitrave, Luftëtari, me seancën e paradites së djeshme, mbylli përgatitjet për sfidën e sotme të Kupës me Partizanin. Ditë më parë, presidenti i Luftëtarit, Vangjel Tavo, lidhur me objektivin e klubit në Kupë u shpreh: "Nuk heqim dorë nga Kupa dhe jemi të përqendruar për të marrë gjithçka nga ky kompeticion". Në të njëjtën linjë me presidentin është edhe trajneri Julian Ahamtaj. Në konferencën e djeshme për shtyp trajneri i Luftëtarit nuk e anashkaloi objektivin në Kupë, por përparësi mbetet kampionati, ku duhet siguruar mbijetesa. "Ndeshjet e Kupës janë të vështira, për vetë rëndësinë që ka ky kompeticion. Do të impenjohemi maksimalisht për të marrë gjithçka nga ndeshja e parë. Rezultati i këtij takimi në transfertë do të thotë shumë për objektivin. Si në çdo ndeshje radhe, edhe sot do të mundohemi të mos pësojmë gol. Futbolli është i bukur, dhuron emocione, por kërkon përqendrim. Partizani është një ekip i fortë dhe i vështirë për t'u mundur, por ne do bëjmë lojën tonë për të pasur mundësi kualifikimi në fundin e përballjes së dytë që e luajmë në shtëpi", tha fillimisht Ahmataj. Për të prekur turin gjysmëfinale, dyshja Ahmataj-Novi gjatë ditëve përgatitore, në kuadër të ndeshjes së sotme, ka punuar sistematikisht me lojtarët për t'i përballur "demat" si të barabartë. "Në fushë do futemi për të bërë lojën tonë, të ndërgjegjshëm se përballë kemi një kundërshtar si Partizani. Do synojmë kualifikimin me të kuqtë dhe ky është objektiv për Luftëtarin, por prioritet për ne ka kampionati. Gjithsesi, duhet të japim më të mirën në ndeshjen e parë, gjithnjë pa e nënvlerësuar këtë kompeticion", vijoi Julian Ahmataj.
KAMPIONATI - Përpos vëmendjes që presidenca dhe stafi bluzi i ka kushtuar Kupës, Ahmataj nuk hezitoi t'i mëshonte faktit se gara në kampionat është e gjatë dhe shumë e vështirë, ndaj duhet vlerësuar maksimalisht. "Për të qenë sa më konkurrues në kampionat kërkohet edhe rrotacion në kësisoj ndeshjesh. Gara e gjatë do lojtarë dhe kontingjent të plotë, ndaj në Kupë me Partizanin është e kuptueshme që do të ketë lëvizje në formacion. S'mund të flas tani për formacion e pritshëm me Partizanin. E rëndësishme është dhënia e maksimumit nga lojtarët që do të jenë të pranishëm në fushë. Ndërprerja na favorizoi disi, pasi na janë rikuperuar një pjesë e mirë e lojtarëve dhe ky fakt për ne ka rëndësi të veçantë. Kishim lojtarë të dëmtuar më herët dhe faktori kohë na favorizoi që një pjesë e mirë e tyre të fitojnë kondicionin e duhur fizik", përfundoi trajneri i Luftëtarit.